"Avqust ayının sonunda Füzuli şəhərində yeni açılan ümumtəhsil məktəbində dərs deyən müəllimlərin məskunlaşma prosesi həyata keçiriləcək".

Bunu Valyuta.az-a Milli Məclisin deputatı Vüqar Bayramov deyib. 

Deputat bildirib ki, Füzuli şəhərində istifadəyə veriləcək orta məktəb Özbəkistan dövlətinin dəstəyi ilə inşa edilir:

“Bu Özbəkistanın Azərbaycanın qələbəsinə dəstəyidir. Həmin məktəbdə şagird və müəllim sayının təminatında heç bir problem olmayacaq. Artıq bu istiqamətdə işlər gedir. Ayın sonunda Füzuli şəhərinə məskunlaşma prosesi həyata keçiriləcək ki, onların da arasında həmin məktəbdə dərs deyən müəllimlər olacaq”.

Xatırladaq ki, Füzuli şəhərində Özbəkistan Prezidenti Şovkat Mirziyoyev tərəfindən özbək xalqı adından hədiyyə olunan məktəbdə 960 şagird təhsil alacaq. Layihəyə əsasən tikinti işlərinin bitməsi bu ilin sonuna gözlənilir. Məktəbdə 40 sinif otağı, 6 laboratoriya, 2 informatika otağı, 5 funksional tədris otağı, akt zalı, idman zalı, yeməkxana, kitabxana yaradılacaq. Məktəbin ərazisində futbol meydançası, istirahət və keçiriləcək tədbirlər üçün yerlər, qazanxana, su çənləri, transformator yarımstansiyası inşa ediləcək. İşlər yüksək keyfiyyətlə, tikinti normalarına uyğun şəkildə aparılır. Füzuli şəhərinə qayıdan ilk şagirdlər məhz bu məktəbdə təhsil alacaqlar. 

Aylin