“Bu qiymətlər valideynlər üçün əlçatandır”.

Bunu Valyuta.az-a açıqlamasında təhsil eksperti Elçin Əfəndi yeni məktəbli formalarının qiymətini şərh edərkən deyib. Ekspert əvvəlki dövrlərdə məktəbli formalarının baha satıldığını və ailələrin büdcəsi ilə uyğunlaşmadığını bildirib:

“Valideyn bir forma almaq üçün 80-100 manat xərcləyirdi. Əgər deyilən qiymətə satılacaqsa, düşünürəm ki, bu qiymət ailələri qane edəcək. Qiymət əlçatandır. Amma məktəbli geyiminin hər il dəyişməsi doğru yanaşma deyil”.

Ekspert hesab edir ki, şagird eyni formanı geyə bilirsə, ona imkan yaratmaq lazımdır:

“Əsas odur ki, aidiyyatı qurumlar formaların satışına nəzarət etməlidir ki, işbazlar bundan faydalanmasın. Ölkədə təxminən 1 milyon 600 min şagird var. Onların hər birinin forma alması kifayət qədər böyük məbləğin toplanmasına gətirib çıxardacaq. Ona görə düşünürəm ki, yeni formaların satışı minimal qiymətlər üzərindən həyata keçirilsə daha məqsədəuyğun olar”.

Qeyd edək ki, 2022-2023 tədris ilində aşağı siniflər (I-VI) üçün hazırlanan məktəbli formalarının qiyməti açıqlanıb. "Bakı Tikiş Evi" ASC-nin satış şöbəsinin müdiri Etibar Əzimov mətbuata açıqlamasında bildirib ki, 2022-2023 tədris ilində məktəb hansı rəngi seçibsə, üç il müddətində həmin rəngdən istifadə etməlidir: "Yeni məktəbli formalarında bütün ölçülərdə uzunqol və qısaqol köynəklərin qiyməti 15, şalvar və ətək isə 25 manata olacaq. Parçalar Türkiyə və Belarusiyadan gəlir".

Aylin