“Azərbaycanın da rəqəmsal manata keçməsi yaxşı olardı, amma mən bunu yaxın illərdə gözləmirəm”

Bu sözləri Valyuta.az-a bank məsələləri üzrə ekspert Əkrəm Həsənov “Azərbaycan rəqəmsal manata keçə bilərmi” sualına cavab verərkən deyib. 

Ekspert deyir ki, nəzəri cəhətdən Azərbaycan rəqəmsal manata keçə bilər, amma praktiki cəhətdən mümkün deyil:

“Çünki bizdə o işi bilənlər, FİNTEX deyilən maliyyə sahəsində mütəxəssislər yoxdur. Yəni, həm də maliyyə sahəsində İT mütəxəssislərinə ehtiyac var”.

Əkrəm Həsənov bildirib ki, rəqəmsal valyuta o cümlədən korrupsiya ilə mübarizə üçün vacibdir:

“Azərbaycanda isə korrupsiya ilə real mübarizə yoxdur. Bizdə məmurlar gəlir-xərc bəyannaməsi vermir. Bu sahədə qanunvericilik olsa da onun tətbiqi mexanizmi yoxdur. Ona görə də bunu etmək məmurlara sərf etməz”. 

Qeyd edək ki, Rusiyada avqustun birindən rəqəmsal rubl fəaliyyətə başlayacaq. Rəsmi açıqlamada qeyd olunub ki, rəqəmsal rubldan istifadə edilməklə həyata keçiriləcək bütün ödənişlər şəffaf olacaq. Ona görə də belə valyutanın dövriyyəyə buraxılmasını Rusiyada korrupsiyaya qarşı mübarizə formalarından biri adlandırmaq olar.

Davud