"Sertifikasiya imtahanlarında 10 bal toplaya bilməyən 223 müəllimin adının açıqlanması davranış etik qaydalarına ziddir".

Bunu Valyuta.az-a açıqlamasında təhsil eksperti Elçin Əfəndi deyib. Onun sözlərinə görə, bu vəziyyət başa düşülən olmalıdır:

“Həmin müəllimlərə bir il vaxt verilir. Bir ildən sonra təkrar imtahan verəcəklər. İmtahanın nəticəsindən asılı olaraq onların əmək müqaviləsinə xitam verilməsilə bağlı qərar veriləcək. Bu baxımdan həmin siyahının açılmaması nazirlik və ictimaiyyət nümayəndələri tərəfindən uyğun görülür”.

Ekspert göstəricilərin bu şəkildə olması təhsil adına ləkə olduğunu qeyd edib:

“Bu acınacaqlı bir durumdur. Həmin müəllimlər illərlə bizim övladlarımıza dərs deyir. Onların bizim uşaqlara dərs deməsi nə dərəcədə düzdür? Bunları niyə işə qəbul eləmişik? Belə müəllim təhsil sistemində niyə qalır? Belələrinin tədricən prosesdən kənarlaşdırılması ən məntiqli qərardır. Müəllimin konkret olaraq ixtisası ilə bağlı şagirdə verdiyi müəyyən mövzu ilə bağlı informasiyaya malik deyilsə, onun təhsil prosesində saxlanılması doğru deyil”. 

Elçin Əfəndi hesab edir ki, əgər bu müəllimlər 25 şagirdə dərs deyirsə, konkret olaraq onların hər birini zəhərləyir.  

Qeyd edək ki, sertifikasiya imtahanlarında iştirak edən 13 min 300 müəllimin və ya sinağa qatılanların 35 faizinin 30 balı toplaya bilməməsi haqqında məlumat açıqlanıb.  Eyni zamanda, 223 müəllimin balı bir rəqəmli olub, yəni onlar hətta 10 bal belə toplaya bilməyiblər. 

Aylin