Türkiyənin enerji və təbii sərvətlər naziri Alparslan Bayraktar Şırnakdakı Gabar neft yatağında gündəlik hasilatın 61 min barrelə çatdığını açıqlayıb. 

Valyuta.az-ın məlumatına görə, Bayraktar bildirib ki, 2023-cü ilin noyabr ayında Türkiyədə ümumilikdə 3 milyon 425 min barrel xam neft hasil edilərək rekord göstəriciyə nail olunub. 

"Noyabr ayında Türkiyədəki ümumi hasilatımızın yarısını Gabar yatağından təmin etdik", deyə o qeyd edib.

Bayraktar milli enerji və mədən siyasəti çərçivəsində neft və təbii qaz axtarışlarında strategiyanın yenidən qurulduğunu vurğulayıb. Yeni strategiya çərçivəsində dərin dəniz qazma və seysmik araşdırma gəmilərindən ibarət bir flotun yaradıldığını bildirib.

Nazir xatırladıb ki, bu strategiya sayəsində 2020-ci ildə Türkiyə tarixinin Qara dənizdə ən böyük təbii qaz kəşfi həyata keçirilib. Hazırda Sakarya qaz yatağında gündəlik hasilatın 7 milyon kubmetrə yaxınlaşdığını deyən Bayraktar bildirib: "Bu hasilatla birlikdə hazırda 3,5 milyon evin ehtiyacını öz təbii qazımızla qarşılayırıq".

Bayraktar Şırnak Gabar yatağında 2021-ci ildəki kəşfin Türkiyə tarixində quruda həyata keçirilmiş ən böyük neft kəşfi olduğunu xatırladıb:  "Bugün Gabar yatağında gündəlik hasilatımız 61 min barrelə çatıb. Noyabr ayında isə ümumi Türkiyə hasilatının yarısı bu yataqdan təmin edilib".

Bayraktar milli enerji və mədən siyasətinin vacib bir istiqamətinin yerliləşdirmə hərəkatı olduğunu diqqətə çatdırıb. O bildirib ki, neft sənayesində milli texnologiyalar inkişaf etdirilərək böyük bir ekosistem formalaşdırılıb və artıq bir çox proqram təminatı və avadanlıq yerli imkanlarla istehsal edilir.

Nazir TPAO-nun 2023-cü ildə satınalmalarının 53%-ni, xidmət tədarüklərinin isə 99%-ni yerli mənbələrdən əldə etdiyini bildirib. Enerjidə tam müstəqillik üçün yerliləşdirmə proqramının davam edəcəyini vurğulayıb.

Bayraktar çıxışını bu sözlərlə tamamlayıb: "Yeni dövrdə milli çempion olacaq bir TPAO-nu yenidən quraraq çox daha müasir və çevik idarəetmə sisteminə sahib olacağıq".

Paşa Məmmədli