Rusiya İxrac Mərkəzi (REC) Rusiya və Ermənistan arasında iqtisadi əməkdaşlıq üzrə hökumətlərarası komissiya çərçivəsində İrəvanda nümayəndəliyini açıb və bu, xarici ölkələrdə sayca 13-cü nümayəndəlik olub. 

Valyuta.az xəbər verir ki, bu barədə mərkəzin mətbuat xidməti məlumat yayıb.

“Dekabrın 15-də İrəvanda Rusiya İxrac Mərkəzinin (REÇ) Ermənistandakı nümayəndəliyinin açılış mərasimi olub. Mərasim Rusiya və Ermənistan arasında iqtisadi əməkdaşlıq üzrə hökumətlərarası komissiya çərçivəsində baş tutub”, - press-relizdə deyilir.

Qeyd olunur ki, mərkəz Rusiya ixracatçılarına Ermənistanda potensial alıcıların axtarışı, danışıqların təşkili, erməni tərəf müqabillərinin etibarlılığının yoxlanılması, eləcə də biznes layihələrinin həyata keçirilməsində maliyyə dəstəyi daxil olmaqla geniş spektrli xidmətlər göstərəcək.

"Rusiya-Ermənistan ticarət-iqtisadi əlaqələrinin inkişafı həm ənənəvi qarşılıqlı fəaliyyət sahələrinin inkişafı baxımından, həm də yeni tərəfdaşlıq sahələrinin yaradılması mövqeyindən bizim üçün həmişə xüsusi əhəmiyyət kəsb edib", - açılış mərasimində Rusiya Federasiyasının İqtisadi İnkişafı Nazirliyinin nazir müavini Dmitri Volvaç bildirib. O, Rusiya İxrac Mərkəzinin Ermənistandakı nümayəndəliyini “ölkələr arasında əlaqələrin inkişafında yeni mərhələ” adlandırıb. Onun fikrincə, mərkəzin vəzifəsi Rusiya və Ermənistanın işgüzar dairələri arasında davamlı dialoqun davam etdirilməsinə kömək etməkdir.

Rusiya İxrac Mərkəzinin baş direktoru Veronika Nikişina hesab edir ki, dünyada mövcud vəziyyət Moskva ilə İrəvan arasında münasibətlərin inkişafına kömək edir və REÇ-in Ermənistandakı nümayəndəliyi yerli işgüzar dairələrlə “səmərəli qarşılıqlı fəaliyyətin qurulmasına” kömək edəcək”.

Rusiya ixrac mərkəzinin Ermənistandan başqa daha 12 xarici nümayəndəliyi var. REÇ nümayəndələri Hindistan, Vyetnam, Türkiyə, Qazaxıstan, Çin və digər ölkələrdə fəaliyyət göstərirlər.

Nicat