“4 gündür qəza olub, “Atəşgah Sığorta” şirkətinin eksperti qiymətləndirməyə gəlmir”.

Valyuta.az xəbər verir ki, bloger İlkin Rüstəmzadə “Atəşgah sığorta” şirkətindən şikayətçidir. 

O avtomobilinin kasko sığortasını “Atəşgah Sığorta”da həyata keçirib. Bir neçə gün əvvəl yüksək sürətlə hərəkət edən avtobus onun “Porsche” markalı avtomobilini vurub. Avtomobil servisə aparılsa da, təmirə başlanılmayıb. Səbəbi də odur ki, sığorta şirkəti dəyən zərəri qiymətləndirməyə gəlməyib:

“Ekspertləri qiymətləndirməyə gəlmir. Yığıram, deyirlər sizinlə əlaqə saxlayacağıq. Əlaqə adı ilə mesaj göndərirlər ki, filan nömrə ilə danışın. Həmin nömrəyə gündə 10 dəfə zəng vururam, açan olmur. Mesajlara isə reaksiya verilmir. Avtomobil də qalıb servisdə. Ustalar da sökə bilmirlər, çünki “Atəşgah” deyib ki, biz olmadan əl vurmayın, qiymətləndirmə edəcəyik. Deyir, siz əl vurmayın, özləri də gəlmir. Di gəl ki, “Atəşgah”dan xəbər yoxdur”. 

Bloger qeyd edib ki, adi qaydada bir həftəyə həll olunmalı olan iş gecikdirilir. Sığorta şirkətinin məsuliyyətsizliyi onun bəlkə də 1 ay avtomobilsiz qalmasına səbəb olacaq. 

İlkin Rüstəmzadə əlavə edib ki, belə davam etdiyi halda aidiyyatı qurumlara şikayət edəcək və sığorta şirkətini məhkəməyə verəcək. 
Sığorta şirkətindən isə blogerin şikayətinə hər hansı reaksiya verilməyib.

Pünhan