Argentinanın İqtisadiyyat Nazirliyinin yeni rəhbəri Luis Kaputo ölkə iqtisadiyyatını xilas etməli olan ilk islahatları təqdim edib. 

Valyuta.az xxəbər verir ki, bunlardan biri milli valyutanın ABŞ dollarına nisbətdə devalvasiyasıdır.

"Rəsmi məzənnə 800 peso olacaq ki, istehsal sektorları istehsallarını artırmaq üçün adekvat stimullara sahib olsunlar", deyə Kaputo gələcək islahatlarla bağlı müraciətində bildirib.

Argentina Milli Bankının məlumatına görə, dollar hazırda 400,5 peso qiymətinə satılır.

2023-cü ildə Argentinada inflyasiya iki dəfədən çox artıb və "Bloomberg"in verdiyi məlumata görə, ölkə sakinlərinin təxminən 40%-i yoxsulluq həddinin altında yaşayır. Bu yaxınlarda vəzifəyə başlayan Argentina prezidenti Xavyer Miley iqtisadi böhranı "şok" islahatlar yolu ilə həll edəcəyinə söz verib.

Miley xalqa müraciətində dövlətin xərclərini xeyli azaltmalı olacağını və yaxın gələcəkdə iqtisadi vəziyyətin daha da pisləşəcəyini, lakin o zaman argentinalıların səylərin bəhrəsini görəcəyini deyib.

Paşa Məmmədli