Macarıstan Avropa Birliyinin Ukraynaya ayırdığı 50 milyard avroluq yardım paketini bölməyi təklif edib və 25 milyard avronun kifayət edəcəyini bildirib. 

Valyuta.az xəbər verir ki, bu barədə "Bloomberg" məlumat yayıb .

Qeyd olunur ki, ötən həftə Macarıstan Aİ-yə üzv dövlətlərə indiki mərhələdə Ukrayna üçün 25 milyard avronun kifayət edəcəyini bildirib. Həmsöhbətlər əlavə ediblər ki, Aİ bu töhfəni 2024-2027-ci illərdə ödəmə müddətinin yarısında qiymətləndirməlidir, o zaman Ukraynanın ehtiyaclarından asılı olaraq daha 25 milyard avro verilə bilər.

Aİ-nin Ukraynaya dəstək verməklə bağlı konsensusuna baxmayaraq, Kremlə dost olan Macarıstan hökuməti yardıma mane olmağa çalışdığı üçün çətin tərəfdaşa çevrilib. 

“Baş nazir Viktor Orbanın hökuməti qanunun aliliyi və korrupsiya ilə bağlı problemlərə görə Aİ-nin kritik fondlarına daxil ola bilməməsi də daxil olmaqla, bir sıra problemləri qeyd edib. Həm də onun sözlərinə görə, qonşu dövlət etnik macar azlığına qarşı pis rəftar edir”, - hesabatda deyilir.

Ukrayna üçün proqram Aİ-nin uzunmüddətli büdcəsinə baxışın bir hissəsidir. Aİ-nin icraedici orqanı olan Avropa Komissiyası ilin sonuna qədər saziş bağlamağa ümid edirdi. Lakin Aİ büdcəsinin ümumi nəzərdən keçirilməsi ilə bağlı mövqelərdə fikir ayrılıqları var ki, bu da onun qəbulu üçün zəruri olan yekdilliyi poza bilər.

Xatırladaq ki, Avropa Parlamenti Aİ-nin 2021-2027-ci illər üçün büdcəsinə yenidən baxılması ilə bağlı qətnamənin lehinə səs verib ki, bu da xüsusilə Ukraynanın 50 milyard avroluq xüsusi fondunun yaradılmasını nəzərdə tutur.

Nicat