30 dəqiqə ərzində pizzanızı çatdırmasalar, pizzanın pulsuz olacağını vəd edən bu kampaniya “Domino's”un uğurunda mühüm rol oynayan bir kampaniya oldu. Bəs, bu əfsanəvi kampaniya “Domino's”u pizza sənayesinin zirvəsinə necə daşıdı və hansı nəticələr əldə olundu?

Valyuta.az-ın verdiyi xəbərə görə, bu kampaniya 1960-cı illərdə başlayıb. Bu kampaniya “Domino's”u əvvəlcə ABŞ-ın, sonra isə dünyanın lider pizza şəbəkələrindən biri etdi. O dövrdə insanlar uzun çatdırılma müddətlərindən şikayət edirdilər. “Domino's” bu problemi həll edərək fərq yaratmaq üçün həmin əfsanəvi kampaniyanı həyata keçirdi.

Bunu reallaşdırmaq və sürətli çatdırılma üçün proseslər optimallaşdırıldı, sadələşdirilmiş menyu, praktiki pizza qutuları və səmərəli mətbəx avadanlıqları üzərində işlənərək bir pizzanın ortalama 28 dəqiqəyə çatdırılması mümkün oldu. Bu strategiyanın əsas məqsədi müştəri məmnuniyyəti idi və 30 dəqiqəlik kampaniya sürətin “Domino's”un marka kimliyinə çevrilməsini təmin etdi.

Böyük uğur qazanan bu kampaniya Domino's-un bazar payını 15%-ə qədər artırdı. Lakin bu uğurun acı bir nəticəsi oldu.

Kampaniya sürətə fokuslanmışdı və sifarişləri tez bir zamanda çatdırmağa çalışan kuryerlər üzərində böyük bir təzyiq yaradaraq onları tıxac qaydalarını pozmağa vadar etdi. 1980-ci illərdə, sürətə çatmaq məqsədilə kuryerlər trafik qaydalarını pozmağa başladı və nəticədə yol qəzaları artdı.

Ölümlə və ciddi yaralanmalarla nəticələnən yol qəzaları həm şirkət, həm də qəzaya uğrayanlar üçün böyük faciələrə səbəb oldu və nəticədə böyük bir böhrana çevrildi. Şirkətin 1988-ci ildəki hesabatlarına görə, çatdırılma qəzalalarında 20 nəfər həyatını itirib.

Bu qəzalardan sonra yüzlərlə məhkəmə işləri başladıldı. Bu, kampaniyanın davam etdirilməsinin qeyri-mümkün hala gəlməsinə səbəb oldu. Məhkəmələrdə kampaniyanın kuryerləri və ümumiyyətlə, trafiki təhlükəyə atdığı üçün qəzaların şirkətə aid olduğu iddiası irəli sürüldü. 1993-cü ildə açılan böyük bir dava nəticəsində isə “Domino's” milyonlarla dollar təzminat ödəməyə məcbur oldu.

Əvəz Həsənov