Şərikli biznes qurmağın mənfi və müsbət tərəfləri
Biznes quran zaman bəzi şəxslər tək başlamağın uğursuz nəticələndiyini düşünsə də, bəziləri isə şərikli biznes qurulmamasının tərəfdarıdır. Təbii ki hər kəsin öz yanaşması ola bilər, amma maraqlıdır, ümumi biznes dünyası olaraq yanaşsaq, şərikli biznes quraqmı?
Biznes konsultant Solmaz Yaqubova Valyuta.az-a bildirdi ki, ehtiyac olmadığı müddətdə şərikli iş görülməsə yaxşıdır: “Şərikli biznes iki və daha çox şəxsin birlikdə qurduğu və yaxud idarə etdiyi biznesə deyilir. Günümüzdə insanlar işlərini asanlaşdırmaq və ya bunun kimi bir neçə məqsədlər üçün şərikli bizneslərə üz tuturlar. Düşünürəm ki, əgər şərikli iş qurulursa, tərəflərin bir-birinə hər hansısa mövzuda ehtiyacı olmalıdır. Bu ehtiyac ideya, məlumat və ya maddiyyat ola bilər. Bu zaman ortaq olaraq biznes qurmaq olar”.
S.Yaqubovanın sözlərinə görə, şərikli biznes quran zaman öncədən hazırlıqlı olmalı olduğumuz məqamlar var: “İlk olaraq ortağımızı yaxından tanımalıyıq. Onların həyat tərzi, yaşı, yaşam stili, düşüncə tərzi, iş həyatındakı aktivliyi barəsində müəyyən qədər tanışlığımız olmalıdır. Hər hansı şərikli işə başlamazdan öncə, mütləq şəkildə kimin hansı işi görəcəyi dəqiq şəkildə müəyyənləşdirilməlidir. Biznesdəki ortağların rolunun nədən ibarət olması, görəcəkləri vəzifələr və s. dəqiqləşdirilməlidir”.
Solmaz Yaqubova biznes ortağımızda hansı parametrlərin olması haqqında da danışdı: “Biznes otağımızı seçərkən bizdə əksik olan tərəflərin onda olmasına və bir-birimizi tamamlayaraq hərəkət edilməsinə diqqət etmək lazımdır. Digər bir nüans da şəriklər arasında olan anlayış və empatiyaya diqqət yetirmək lazımdır ki, gələcəkdə ortaqlar arasında hər hansı mübahisə olmasın. Şərikli biznes qurduqda son qərarın kimin verməsini təyin etmək lazımdır. Çünki iki şəxsin hər zaman eyni fikirə gəlməsi bir növ qeyri-mümkündür. Buna görə də ortaqlı işdə şəriklərin sayından asılı olmayaraq, mütləq son qərarı verən bir şəxs təyin edilməlidir. Bu şəxs daha çox idarəçilik bacarığına sahib olmalı, hər kəsi yaxşı tanıyan və yönləndirə bilən bir şəxs olmalıdır”.
Biznes konsultantı şərikli biznesin müsbət cəhətlərini də qeyd etdi: “Əsas müsbət cəhətlərdən biri şəriklərin bir-birini tamamlamasıdır. Digər tərəfdən, ideyası olan şəxsin maliyyə problemləri olarsa, ona maddi dəstək olacaq bir şəxs taparaq öz imkanlarını birləşdirərək ortaya yaxşı bir iş çıxarmaq olar. Biznes qurarkən sizin görmədiyiniz mənfi tərəfləri, neqativ nüansları görəcək başqa bir gözə ehtiyac olur. Bu kimi müsbət tərəfləri var”.
S.Yaqubova müsbət tərəflərlə yanaşı, şərikli biznesin mənfi tərəfləri olduğunu da dedi: “Hər zaman nəzərə almaq lazımdır ki, nə vaxtsa bu şəriklik bitə bilər. Ona görə də ehtiyat plan olmalıdır ki, nə vaxtsa tərəflərdən biri ayrılmaq istəsə, o zaman şərtlər necə olacaq, kimə nə qədər hissə düşəcək və s. Bu haqda mütləq rəsmi müqavilə imzalanması lazımdır. Bu hər iki tərəfin rahatlığına gətirib çıxarır və şəriklərdən biri ayrılarsa, vəziyyət necə olar deyə heç bir tərəf narahat olmayacaq”.
Əvəz Həsənov
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay