Hər kəs həyatı boyu bir dəfə də olsa, işləmədən, oturduğu yerdən pul qazanmağın xəyalını qurur. Hər işə gedəndə, “kaş işə getmədən, işləmədən qazana bilərdim” deyə düşünənlər az deyil. Bu mümkündür. Passiv gəlir deyə bir anlayış var ki, siz işləmədən pul qazana bilirsiniz?

Bəs passiv gəlir nədir və bu üsulla necə pul qazan bilərsiniz?

Biznes konsultand Elxan Sultanlı Valyuta.az-a passiv gəlir barədə danışdı: 

“Passiv gəlir şəxsin özünün iştirakı olmadan gələn gəlir formasıdır. Biz bu gün istər biznes, istər hansısa özünə məşğulluq olsun, hər işdə zaman xərcləyirik. Xərclədiyimiz zamanın ekvivalentində gəlir qazanırıq. Bu passiv gəlir sayıla bilməz. Passiv gəlir birbaşa şəxsin iştirakı olmadan gələn gəlir növüdür”. 

Elxan bəy Azərbaycanda passiv gəlirin ən çox yayıldığı sahəni izah etdi: 

“Passiv gəlirin Azərbaycanda ən geniş yayılmış forması hansısa evin və yaxud ticarət obyektinin alınıb, sonradan icarəyə verilməsidir. Bu prosesdə adam özü iştirak etmir, sadəcə olaraq öncədən 30 000-100 000 investisiya qoyur və o investisiyanın hər ay kiçik formasını geri alır. Fiziki olaraq orada iştirak etmir”. 

E.Sultanlı dünyada passiv gəlirin ən geniş yayılmış növünün mələk investorluq olduğunu bildirdi: 

“Dünyada passiv gəlir daha çox startaplara investisiya yatırmaqla qazanılır. Sahibkarlar bir neçə startaplara, layihələrə yatırım edirlər, investisiya qoyurlar. O layihələrdən bir neçəsi tutur. Fiziki olaraq başqa komanda işləyir, amma sahibkar investisiyada müəyyən paya sahib olduğu üçün oradan gəlir götürə bilir”. 

Nuray