![](https://valyuta.az/file/articles/2023/12/11/1702284153_employee-experience.jpg)
Peşəkar insan resursları nümayəndəsinin hansı bacarıqları olmalıdır?
İnsan resursları mütəxəssisi Aygün Hüseyn yazır.
Bəzi İnsan resursları nümayəndələri elə bilir ki, onların işi sadəcə vakansiyanı bağlamaq xətrinə namizədləri tapmaq və sənədləşmə işlərini tamamlamaqdan ibarətdir.
Bəs peşəkar İR nümayəndəsinin hansı bacarıqları olmalıdır? Aşağıda hər bir bacarıq haqqında yazmışam. Həmçinin həmin bacarıqların sizdə olub-olmadığını müəyyənləşdirə bilməyiniz üçün suallar da qeyd etmişəm. Oxuduqca, özünüzü nə dərəcədə peşəkar İR nümayəndəsi olduğunuzu müəyyən etməyə çalışın:
1. Strateji düşüncə - Şirkətin biznes məqsədlərinə uyğun kadr strategiyasını yaratmağı öyrənməlisiniz. İşə cəlb edərkən, onları işə qəbul edərkən, vəzifə dəyişikliyi, hətta xitam edərkən hansısa strategiyaya maliksiniz? Etdiklərinizin məntiqi əsası varmı? Həmin məntiq sizdən başqa da kim üçünsə məntiqlidir?
2. Texnoloji məlumatlılıq - Hər kəs bilir ki, innovasiya və texnologiya biznesi irəli aparan əsas vasitələrdəndir. Bu səbəbdən İR sahəsində ən son tendensiyalarla tanış olmalısınız. İR sahəsinə aid hansı yeni tendesiyalardan məlumatlısınız? Hansını işinizdə davamlı olaraq tətbiq edirsiniz? Ən son əldə etdiyiniz məlumatın yenilənmiş versiyası varmı?
3. Liderlik keyfiyyətləri - İR nümayəndəsi, sadəcə vakansiyanı bağlamaq məqsədi ilə şəxsləri işə cəlb edən əməkdaş deyil, o, şirkət siyasətinə uyğun ən uğurlu komandanı quran bir liderdir. İR-da mövcud prosesləri nə dərəcədə uğurla idarə edə bilirsiniz, yoxsa özünüz idarə edilirsiniz?
4. Sosial bacarıqlar - Müxtəlif xarakterdə olan şəxslərlə uyğun tərzdə ünsiyyət qurmaq, onların "dilini" bilmək üçün psixologiyanın ən azı baza məlumatları ilə məlumatlı olmalısınız. Emosional zəkanın 4 mərhələsini tamamlaya bilmisinizmi? Empatiya ilə aranız necədir?
5. Texniki biliklər - İR nümayəndəsi başlanğıc olaraq əmək məcəlləsi və kadr kargüzarlığı üzrə məlumatlı olmalıdır. Daha sonra İR-nın müasir qolları üzrə müəyyən biliklərə yiyələnərək, təcrübədə düzgün şəkildə tətbiq etməlidir. Çalışdığınız yerdə İR aid hansı texniki biliklərə maliksiniz? Etdikləriniz nə dərəcədə nəzəridir? Praktik biliyiniz öz təcrübənizə əsaslanır, ya kimdənsə eşitdiklərinizdir?
Yuxarıdakı suallara cavab axtarmağa çalışın. Cavabınız müsbətdirsə, hər bir punktu dolğun şəkildə tamamlaya bilməyiniz üçün əsaslı deyəcəkləriniz varsa, sizi təbrik edirəm. Yox, cavabınız mənfidirsə, bütün suallara cavab olaraq sizin üçün ən rahat yolları seçmisinizsə, guman ki, hazırda kor-koranə avtonom rejimdə çalışırsınız. Belə ki, bu rejimdə işləyən İR nümayəndələri problemi heç bir şəkildə özündə deyil daha çox ətrafda axtarmağa çalışırlar. Bu şəxslərin daima gileylənmək, kimisə günahlandırmaq, öz uğursuzluğunun acığını çıxmaq kimi keyfiyyətləri əsas xarakterik əlamətləridir.Amma narahat olmayın, bu son deyil. Siz hər an üzərinizdə işləyərək dəyişə bilərsiniz.
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay