Sosial sahibkarlıq biznesin bir qolu hesab olunur, amma digər biznes növlərindən fərqlənir. Dünyada sosial sahibkarlıq geniş yayılıb. Azərbaycanda da müəyyən sosial bizneslər var ancaq hələ ki geniş yayılmayıb. Ölkəmizdə sosial sahibkarlıq, bu sahibkarlıq növünün mahiyyəti ilə bağlı məlumatlılıq azdır.

Bəs sosial sahibkarlıq nədir və buna niyə ehtiyac var?

İqtisadçı Samir Əliyev Valyuta.az-a açıqlamasında bildirdi ki, sosial sahibkarlığın məqsədləri digər bizneslərdən fərqlidir: 

“Biznesin əsas məqsədi - istənilən addımı, strategiyası, hədəfi gəlir götürməkdir. Bütün fəaliyyətlər buna uyğun qurulur. Burada sosial amillər ya nəzərə alınmır, ya da 2-ci dərəcəli hesab olunur. Bu da sosial baxımdan köməyə, yardıma bilik və bacarığının artırılmasına ehtiyacı olan insanların kənarda qalmasına gətirib çıxarır. Sosial sahibkarlıq isə biznesin bir qolu sayılsa da, əsas məqsədi heç də gəlir, mənfəət götürmək deyil. Onun məqsədi sosial, ekoloji baxımdan cəmiyyətə fayda verməkdir. Gəlir götürmək onun məqsədi yox, sadəcə vasitədir. Yəni gəliri ona görə götürür ki, öz qarşısına qoyduğu sosial, iqtisadi, ekoloji məqsədinə çatsın”.

Samir Əliyev sosial sahibkarlığın məqsəd olaraq seçdiyi istiqamətlərdən də danışdı: 
“Sosial sahibkarlığın hədəfləri sosial baxımdan həssas qruplar, pensiyaçılar, əlillər, işsiz qadınlara yardım etmək və s. kimi mövzular olur. Bundan başqa, bilik və bacarığı olan insanların inkişafına yönəlik addımlar atıla bilər. Sosial sahibkarlığın hədəfləri həm sosial subyektlərdir, həm də ekoloji problemlərin aradan qaldırılması ola bilər. Yəni burada təbiətin qorunması, tullantıların təmizlənməsi, iqlim dəyişikliyi ilə bağlı bir sıra təşəbbüslər ola bilər. Bütün bunlar sosial sahibkarlığın əsas hədəfləridir”. 

İqtisadçının sözlərinə görə, bir sıra hallarda insanlar sosial sahibkarlığın əlilliyi olan şəxslərə dəstək verilməsi, onların işlə təmin olunmasına yönəlik bir sahə olduğunu düşünürlər: "Bu yanaşma düzgün deyil. Sosial sahibkarlıq həm də əlillərin işlə təmin olunmasına yönəlikdir, amma təkcə əlillərə aid deyil. Bu kimi yanaşmanın olması göstərir ki, ölkəmizdə bu istiqamətdə məlumatlılıq azdır".

Samir Əliyev deyir ki, sosial sahibkarlıq məcburi köçkünlərin öz torpaqlarına qayıdışı zamanı onları işlə təmin etməyə təşəbbüs göstərə bilər:

“Sosial sahibkarlığın hədəfləri həmçinin keçmiş məcburi köçkünlər ola bilər. Çünki sosial sahibkarlıq həm də yeni iş yerlərinin yaradılması deməkdir. Bu isə əhalinin sosial vəziyyətinin yaxşılaşdırılmasına gətirib çıxarır. Əgər qayıdış proqramı çərçivəsində məcburi köçkünlərin dədə-baba yurdlarına qayıtmasını təmin ediriksə, dəstəkləyiriksə, burada ilk növbədə onların işlə təmin olunması çox vacibdir. Çünki iş olmadan insanların orada yaşaması çox çətin olacaq. Əgər iş yeri olmayacaqsa, insanlar orada çox qala bilməyəcəklər. Məcbur olub paytaxta axın edəcəklər. ona görə də, həmin ərazilərdə sosial sahibkarlığı inkişaf etdirmək vacibdir. Bu baxımdan sosial sahibkarlığa Azərbaycanda çox böyük ehtiyac var”. 

Nuray