“Ümumiyyətlə avtomobil alarkən Çin istehsalı olan, lizinqlə alınan avtomobil demədən diqqət edilməli bir çox məsələlər var”. 

Bu sözləri Valyuta.az-a nəqliyyat məsələləri üzrə ekspert Yasin Mustafa ölkəyə ucuz qiymətə gətirilən Çin istehsalı maşınlar haqqında danışarkən deyib. 

Ekspert bildirib ki, bahalı brend markalar - Almaniya, İtaliya, Çin, Yaponiya, Koreya və s. istehsalı olan avtomobillər var, lakin avtomobil alarkən hər kəs öz büdcəsinə görə maşın almağa çalışır:

“Hər bir ölkənin bahalı və ucuz avtomobili var. Amma yeni, 0 kilometr avtomobildən söhbət gedirsə, çalışmaq lazımdır ki, bu, dilerdən alınsın. Çünki dilerdən alınan avtomobillərin rəsmi zəmanəti olur. Həmçinin həmin avtomobilə servis xidməti təklif edilir. Bir qəza törətdikdə, xarab olduqda avtomobili düzəltdirmək üçün aylarla vaxt itirmirsən. İndi bəzən avtomobilə 100 000, 150 000, 200 000 km, yaxud 3 il, 5 il zəmanət verilir. Bu zəmanət başa çatmayana qədər avtomobildə hansısa texniki nasazlıq olarsa, bunu həmin diler qarşılayır. Dilerdən yox, hər hansı şəxsdən aldıqda zəmanət olmur”. 

Yasin Mustafanın sözlərinə görə, bəzən ölkəyə yeni adı ilə yenilənmiş avtomobillər gətirirlər:

“Həmin maşınları elə yeniləyirlər ki, sadə vətəndaşlar bunu görə bilmir. Diler isə ölkəyə belə avtomobil gətirmir. Çünki dilerlik müqaviləsində elə ağır cəzalar tətbiq edilə bilər ki, belə avtomobilləri ölkəyə gətirməz. Amma ölkəyə fərdi şəkildə maşın gətirib satanlar isə belə əyri yollara baş vura bilirlər. Əsas tövsiyəmiz odur ki, bu avtomobilləri dilerdən, zəmanətlə alsınlar və həmin avtomobillərin ölkədə servisi olsun ki, sonrakı dövrlərdə çətinlik çəkməsinlər”.

Davud