Azərbaycanda ötən ilin ikinci rübündən qoyun-keçi sayında müşahidə edilən azalma hələ də davam edir. Belə ki, 2022-ci ilin aprelində qoyun-keçi sayı 8,169 milyon başa yüksəldikdən sonra azalma mərhələsinə keçib.

2023-cü ilin əvvəlində qoyun-keçi sayı 7,752 milyon başa, apreldə 7,361 milyon başa, iyulda isə 7,32 milyon başa düşüb. Bu da o deməkdir ki, ötən ilin aprelindən bəri qoyun-keçi sayı 849 min baş, yəni 10,4 faiz, ilin əvvəlindən isə 432 min baş, yaxud 5,6 faiz azalıb.

Kənd təsərrüfatı eksperti Vahid Məhərrəmov Valyuta.az-a açıqlamasında qoyun-keçi sayında baş verən azalmanı örüş sahələrinin azalması ilə əlaqələndirib:

“7-8 il bundan əvvəl örüş sahələri, təbii biçənək yerləri, yəni təxminən 400 min hektar ərazi əkinə verildi. Nəticədə heyvandarlıqla məşğul olan sahibkarlar üçün örüş yerləri xeyli azalır. Bu da öz növbəsində həm iri, həm də xırda buynuzlu heyvanların sayının azalmasına rəvac verib. Onun nəticəsidir ki, ölkəyə ildən-ilə daha çox heyvan idxal olunur. Örüş yerlərinin azalması məhsuldarlığın da aşağı düşməsinə gətirib çıxarıb. Qoyun və keçi sayının azalmasının qarşısını almaq üçün örüş sahələrindən istifadə əvvəlki qaydada aparılmamalıdır. Örüş sahələri suvarılmalıdır, əvvəllər belə deyildi, yenilənməli və növbəli otarılmalıdır. Yalnız bu halda həmin örüş ərazilərindən səmərəli istifadə etməklə qoyun və keçi sayının azalmasının qarşısını ala bilərik”.

Ramiz