"Pandemiyadan sonra ilk 5 ildə pambığın ixrac və idxalında azalmaların olması gözlənilən idi”. 

Bunu Qaynarinfo-ya açıqlamasında iqtisadçı ekspert Fuad İbrahimov 2023-cü ilin 5 ayında Azərbaycanda pambığın ixrac və idxalının azalması səbəblərindən danışarkən deyib.

"Bu, sadəcə olaraq statistik göstəricidir. Faktiki olaraq ilin sonunda bu balans tənzimlənəcək. Postpandemiya dövrünü yenicə başa vurduğumuz bir vəziyyətdə statistik məlumatlarda belə xətalar baş verə bilər. Bu, normal haldır. Çünki pandemiya dövründən sonrakı ilk illərdə bir çox fəaliyyət növləri iflic vəziyyətindən yenicə çıxmağa başlayıb. Bu fonda həmin oyanış zamanı idxal-ixrac əməliyyatlarında böyük fərqlərin olması da gözləniləndir. Yəni pambıq idxalının azalması ona ehtiyacın, ixracın azalması isə onun potensialının azalması kimi qəbul olunmamalıdır. Hər hansı bir forsmajor haldan, kataklizmlərdən, o cümlədən pandemiya kimi bəşəriyyətin uzun müddət görmədiyi hadisədən sonra digər sahələrdə olduğu kimi, pambığın ixrac və idxalında da ilk 5 ildə belə azalmaların baş verməsi gözləniləndir. Normal diapozona düşənə kimi bu belə olmalıdır”, deyə iqtisadçı bildirib.

Qeyd edək ki, Dövlət Gömrük Komitəsinin məlumatına görə, bu ilin yanvar-may aylarında Azərbaycan 68 milyon 874 min dollar dəyərində pambıq ixrac edib. Bu isə, keçən ilin müvafiq dövrü ilə müqayisədə 2,2 dəfə azalma deməkdir. Beş ayda Azərbaycana 2 milyon 537 min dollar dəyərində pambıq idxal olunub. Bu da ötən ilin müvafiq dövrünə nisbətdə 11,7 % azalma deməkdir.