Respublikada taxıl biçini davam edir. Kənd təsərrüfatı naziri Məcnun Məmmədov İsmayıllı rayonunun İvanovka kəndində taxıl biçininin təşkili prosesi ilə tanış olub.

Bu il İsmayıllı rayonunda 30186 hektar sahədə payızlıq taxıl əkilib. Əkinlərin 22609 hektarı buğda, 7577 hektarı arpa sahələridir. Artıq rayon üzrə arpa sahələrində biçinə start verilib. Biçin prosesində 21 kombayn iştirak edir. Bugünədək 2500 hektar sahədə biçin yekunlaşıb, sahələrdən 7915 ton məhsul yığılıb. Taxıl üzrə orta məhsuldarlıq 31,7 sentnerdir.

2022-2023-cü il payızlıq taxıl əkini mövsümündə İvanovka kəndində 4700 hektar sahədə taxıl əkilib. Artıq sahələrdən məhsul yığımına başlanılıb. Yüksək aqrotexniki qulluq göstərilmiş sahələrdə yüksək məhsuldarlıq əldə olunub.

Nazir Məcnun Məmmədov İvanovka kəndində taxıl biçini prosesini izləyib, yerli fermerlərlə görüşüb, taxıl sahələrində məhsuldarlığın artırılması üçün həyata keçirilməli olan müasir aqrotexniki tədbirlər barədə fikir mübadiləsi aparıb. Fermerlərlə müzakirələrdə əkin materialının düzgün seçimi, növbəli əkin, vegetasiya dövründə alaq otları və zərərvericilərə qarşı mübarizənin təşkili, dəmyə əkinlərdə torpağın nəmliyinin qorunması üsulları və digər mövzulara toxunulub.

Nazir İvanovka kəndində üzüm bağları, günəbaxan sahələri, toxumluq əkinlərlə tanış olub, İsmayıllı Toxum Emalı Zavoduna baş çəkib, Keyvəndi kəndində “Azza Agro” şirkətinin qurduğu müasir heyvandarlıq kompleksi, Qalınçaq kəndində salınmış müasir intensiv və superintensiv mevvə bağları ilə tanış olub. Görüşlərdə bölgələrdə süd məhsullarının emalı müəssisələrinin qurulması, meyvə ixracının müasir standartlara uyğun təşkili, ixrac bazarlarının şaxələndirilməsi, beynəlxalq ixrac sertifikatlarının alınmasının zəruriliyi və digər mövzularda müzakirələr aparılıb.

Nazir Məcnun Məmmədov səfər zamanı həmçinin İsmayıllı Dövlət Aqrar İnkişaf Mərkəzinin fəaliyyəti ilə tanış olub, kollektivlə görüşüb, fermerlərə xidmətin təşkili ilə maraqlanıb.