Amerikalı elektrikli avtomobil istehsalçısı "Tesla" (TSLA) 2024-cü ildə Çindəki satışlarını artıraraq rekord səviyyəyə çatıb. 

Valyuta.az xəbər verir ki, Çində 657 mindən çox avtomobil satan "Tesla" satışlarını 8,8% artırıb və dünyanın ən böyük avtomobil bazarında güclü performans nümayiş etdirib. "Tesla China" dekabr ayında satışların əvvəlki aydan 12,8% artaraq 83.000-ə çatdığını bildirib. Bu, "Tesla"nın Çin bazarındakı uğurunu bir daha göstərir.

"Tesla"nın 2024-cü ildəki qlobal avtomobil təhvil verilişlərinin 36,7%-i Çindəki müştərilərə edilib, amma şirkətin qlobal satışlarında 1,1% azalma qeydə alınıb. 

CEO Elon Muskın əvvəlki yüngül artım proqnozu həyata keçməyib, Avropada azalan subsidiyalar, ABŞ-da ucuz qiymətli hibrid avtomobillərin artan populyarlığı və Çin mərkəzli "BYD"nin qlobal miqyasda artan rəqabəti bu azalma üçün əsas səbəblər kimi önə çıxır.

Əvəz Həsənov