“Bu qərarla xidmət sahəsində mümkündür ki, qiymətlər bahalaşsın, amma ümumi qiymət artımına təsir göstərəcək gücdə deyil”.

Bunu Valyuta.az-a iqtisadçı Xalid Kərimli mikrosahibkarlarla bağlı Vergi Məcəlləsinə edilən dəyişikliyi şərh edərkən deyib.

İqtisadçı qeyd edib ki, qərar bir və iki işçisi olan mikrosahibarlara  təsir edəcək və onların daha çox vergi verməsinə səbəb olacaq:“

Burda güzəşt 3 və daha çox işçisi olan mikrosahibkarlara və  digər subyektlərə bu qərarın heç bir təsiri yoxdur. Xidmətinin qiymətini artıra bilməyən sahibkarlar isə əvvəl daha çox qazanırdılarsa, indi az qazanacaqlar”.

Xalid Kərimli bildirib ki, mikrosahibkarlar daha çox xidmət sahəsinə yönəlib:

“Eyni zamanda bir sıra fərdi fəaliyyət göstərən xidmət sahələri, layihələr, İT xidmətləri, konsultantlar da mikro sahibkarlardı”.

Qərarın verilmə səbəbləri haqqında da danışan həmsöhbətimiz qeyd edib ki, bununla bağlı müəyyən səbəblər var:

“İlk olaraq, dövlət sektorunda işləyən muzdlu işçilər maaşlarından 20 faizdən çox vergi verirdilər. Mikrosahibkarlar isə bu vergini vermirdilər deyə bu qərarı tətbiq etdilər.  İkinci, vergidən yayınmaların qarşısını almaq üçün bu qərar verildi. Mikro sahibkarlar işləri böyüyəndə onu iki-üç fərdi şəxsin arasında bölürdülər ki, mikrosahibkar kimi dövriyyələrini kiçiltsinlər. Yəni vergidən qanuni yayınma mexanizmləri var idi, ondan istifadə etsinlər.  Məsələn, bir nümunə, blogerlər link paylaşa-paylaşa kifayət qədər gəlir əldə edirlər. Onlar güzəştdən yararlanırdı, təmizlikçi, fəhlə güzəştdən yararlana bilmirdi. Ona görə də bu kimi hallar nəzərə alınıb qərar verildi”.

Qeyd edək ki, 2024-cü il yanvarın 1-dən Vergi Məcəlləsinə dəyişiklik edilib. Mikro sahibkarların gəlir vergisinin məbləği 5 faizdən 20 faizə yüksəlib. 

Yanvarın 1-ə kimi sahibkarların gəlirlərinin 75 faizi vergidən azad idi. Bu ildən etibarən isə bu güzəşt ən azı 3 işçisi olan sahibkarlara aid ediləcək.

Davud