Avropa Yenidənqurma və İnkişaf Bankının dəstəyi ilə yeni peşə ixtisası yaradılıb

7 sentyabr tarixində Avropa Yenidənqurma və İnkişaf Bankının dəstəyi ilə həyata keçirilən “Azərbaycanda bacarıqlara və məşğulluğa çıxışın təmin edilməsi” layihəsi çərçivəsində yeni təşəbbüsə start verilib.

Valyuta.az xəbər verir ki, bu münasibətlə keçirilən tədbirdə elm və təhsil naziri Emin Əmrullayev, ölkəmizdə səfərdə olan Avropa Yenidənqurma və İnkişaf Bankının birinci vitse-prezidenti Yurgen Rigterink və digər rəsmi şəxslər, özəl sektor təmsilçiləri və media nümayəndələri iştirak ediblər.  

Mərasimdə çıxış edən elm və təhsil naziri Emin Əmrullayev son illər peşə təhsilində beynəlxalq tərəfdaşlarla birlikdə həyata keçirilən layihələrin bu təhsil pilləsində keyfiyyətin artırılması baxımından vacib əhəmiyyət kəsb etdiyini vurğulayıb. Elm və təhsil naziri həmçinin özəl sektorun peşə təhsilin inkişafında oynadığı rola da diqqət çəkib. Avropa Yenidənqurma və İnkişaf Bankının birinci vitse-prezidenti Yurgen Rigterink isə qeyd edib ki, ümumi iqtisadi faydaları ilə yanaşı, bu cür layihələrin hər kəs üçün yeni iqtisadi imkanlar yaradacağına inanır. Bu layihə Azərbaycanda həyata keçirilən çoxsaylı digər uğurlu dövlət-özəl tərəfdaşlığı təşəbbüslərindən biri olacaq.

Mərasimin sonunda Elm və Təhsil Nazirliyi yanında Peşə Təhsili üzrə Dövlət Agentliyi və “Avrora” MMC arasında sənayenin tələblərinə uyğun kadr hazırlığının dəstəklənməsi məqsədilə Anlaşma Memorandumu imzalanıb. Memorandum çərçivəsində qida istehsalı sahəsində ixtisaslı kadrların hazırlanması, tələbələrin bilik və bacarıqlarının artırılması, dual proqramların yaradılması, tədris proqramlarının və təlimin keyfiyyətinin yüksəldilməsi nəzərdə tutulur.

Qeyd edək ki, sözügedən təşəbbüs çərçivəsində qida istehsalı sahəsində sənayenin tələblərinə və sifarişlərinə uyğun kadr hazırlığına dəstək məqsədilə Peşə Təhsili üzrə Dövlət Agentliyi və “Avrora” MMC tərəfindən “unüyütmə istehsalının aparatçısı” ixtisası üzrə kurikulum hazırlanmışdır. Cari tədris ilindən etibarən peşə təhsil pilləsində bu ixtisasın tədrisinə başlanılır.

Fotolar: Tural Paşa