2023-cü ilin ilk yeddi ayında “Xalq Sığorta” şirkətinin topladığı sığorta haqları 13,45 milyon manat təşkil edib.

Valyuta.az-ın hesablamasına görə, bu ötən ilin eyni dövrü ilə müqayisədə 40,7% azdır. Başqa sözlə, son bir ildə sığorta şirkətinin yığımları üzrə itkiləri 9,2 milyon manat olub. 2022-ci ilin yanvar-iyul aylarında “Xalq Sığorta” 22,7 milyon manat sığorta haqqı toplaya bilmişdi.
Yığımların kəskin azalması fonunda “Xalq Sığorta”nın sığorta ödənişləri sözügedən dövrdə 4,5% və ya 651 min manat artaraq 15,14 milyon manata yüksəlib. 2022-ci ilin ilk yeddi ayında bu rəqəm 14,5 milyon manat təşkil etmişdi.

Ümumilikdə, sığorta şirkətinin ödənişləri yığımlarını 1,7 milyon manata yaxın üstələyib. Bu isə onun zərərliliyini (ödəniş-yığım nisbəti) kəskin artıb. Belə ki, 2022-ci ilin yanvar-iyul aylarında “Xalq Sığorta” topladığı hər 100 manatdan 63,9 manat ödənişə yönəldibsə, bu ilin eyni dövründə bu rəqəm 112,6 manat təşkil edib.

Qeyd edək ki, 2023-cü ilin may ayında səhmdarların qərarı ilə sığorta şirkətinin idarə heyətinə Roman Vəliyev sədr təyin edilib. Rəqəmlər isə onu göstərir ki, menecmentdəki dəyişiklik şirkətin bazardakı vəziyyətinə hələlik təsir göstərə bilməyib. 

Xatırladaq ki, “Xalq Sığorta” 2004-cü ildə yaradılıb. Onun nizamnamə kapitalı 58,75 milyon manatdır. Şirkətin səhmlərinin 50%-i “İdeal Business Co.” MMC-yə, 50%-i isə “Euro Standard” MMC-yə (“Xalq Bank” ASC-nin 33.85%-lik səhmdarı, “Bank Avrasiya” ASC-nin 37,5%-lik səhmdarı) məxsusdur.

Mahir