H.Rzasoy Azərbaycanda Kooperasiya Universitetində beynəlxalq iqtisadi münasibətlər üzrə bakalavr və magistr təhsili alıb. Daha sonra İsveçin Höteborq Universitetində beynəlxalq idarəetmə üzrə magistratura oxuyub. Ardınca, həmin universitetdə beynəlxalq müsahibatlıq üzrə daha bir magistr təhsili alıb.

 

 

- 1997-98-ci illərdə magistratura təhsili aldım. 2002-ci ildə isə İsveçə gəlmişəm. 4 ildə nə etdiyimi soruşursunuz. İngilis dilimi təkmilləşdirmişdim və onu harada inkişaf etdirə biləcəyim haqqında düşünürdüm. Əcnəbilərin qonaq gəldiyi restoranda masabəyi kimi işə başladım. 2 il orada işlədim. Sonra başqa bir restorana şərik kimi getdim. Daha sonra bir sığorta şirkətində sığorta agenti kimi çalışdım.

 

 

- Həm bakalavr təhsilimi bitirən dövrdə, həm də magistraturadan sonra iş axtarışında idim. İngilis dili biliyim olsa da, ürəyimcə olan iş tapa bilmirdim. Düşünürdüm ki, Azərbaycanda yaxşı iş tapmaq üçün xaricdə təhsil almalıyam. İnternetin Azərbaycana yeni-yeni gəldiyi vaxtlar idi. İnternet klublara gedirdim. Orada CV yazmağı öyrənirdim, xarici ölkələrdə oxumaq imkanlarını araşdırırdım. İsveçə təhsil almaq və sonra Azərbaycana qayıdıb, yaxşı iş tapmaq niyyəti ilə gəldim.

 

 

- Azərbaycanda işlədiyim dönəmdə xaricdə təhsil üçün də pul toplayırdım. Eyni zamanda xarici universitetlərə, amma təqaüdlü olanlara müraciət edirdim. Müraciət zamanı yaxşı təhsil verən ölkələri seçirdim. Birinci il 3, ikinci il isə 5 ölkənin universitetlərinə sənədlərimi göndərsəm də, heç birinə qəbul olmadım. Üçüncü il 7 ölkənin universitetlərinə müraciət göndərdim. Bu dəfə təqaüdlü olmayanlar da var idi. İsveçdə 3, Amerikada 1 universitetə qəbul oldum. Təqaüdlü olmasa da, İsveçin Höteborq Universitetini seçdim. İsveçin ikinci ən böyük şəhəri idi, ona görə düşündüm ki, həm də bu cəhətdən yaxşıdır.

 

 

- Bir az özüm toplamışdım, bir az valideynlərim verdi, bir qismini də dostumdan borc aldım. Ümumilikdə əlimdə çox məhdud miqdarda pul var idi. Bilirdim ki, İsveçə gələr-gəlməz özümə iş tapmalıyam. Gələndən 3 ay sonra iş tapdım.

 

 

- Qəzet daşıyırdım. Qəzetlər qəsəbəyə gətirilir, bizə ünvanların siyahısı verilirdi, mərkəzdən qəzetləri götürüb ünvanlara çatdırırdıq. Gecə saat 2-dən səhər 6-ya kimi işləyirdim.

 

 

- Vaxt cəhətdən ola bilər, amma çox çətin idi. Azərbaycanda mən restoranda çalışanda əcnəbi qonaqlar gəlirdilər, 3 dollara 2-3 qurtumluq espresso kofesi içirdilər. Deyirdim ki, 3 dollara 2 qurtum kofe niyə içəsən ki? Qəzet daşıyanda, gecələr demək olar, yatmırdım. Universitetdə, bölündüyümüz qruplarda bizə təqdim edilən elmi mövzularda fikir mübadiləsi aparırdıq. Orada hiss edirdim ki, gözlərim açıqdır, amma beynim deyilənləri anlamır. Espressonun 2-sini və ikiqat acılı olanını içirdim ki, beynim çalışsın. Təhsil aldığım müddətdə orada çalışdım.

 

 

- Təhsilimi başa vurandan sonra Finlandiyaya köçdüm. Keçmiş həyat yoldaşımın qohumlarının ailəvi dostu var idi, onların restoranının maliyyə işlərini mənə həvalə etdilər. Paralel olaraq mühasibatlıq bürosunda işə başladım. Mühasibatlıq bürosunda 4-5 şirkətin mühasibatlıq işlərini görürdüm. Orada çox da qalmadıq, qayıdıb İsveçdə işlədim. İsveçdə sahəmlə bağlı iş tapmağım o qədər də rahat olmadı. Finlandiyada işləyəndə İsveçdə 180 şirkətə iş üçün müraciət etmişdim. 10-u müsahibəyə çağırdı. 3 şirkət ikinci müsahibəyə dəvət etdi və bir şirkətdə işə başladım.

 

 

- Bu çətinlik əsasən İsveç dilini bilməməyə görə olurdu. İsveç dilini az-çox bilirsinizsə, burada yaşayırsınızsa, iş tapmaq o qədər çətin deyil. Təbii ki, tək İsveç dili kifayət deyil, ingilis dilini çox yaxşı bilməlisən. Mən bura gələndə ingilis dilini bilirdim, amma çox yaxşı səviyyədə yox. Dil biliklərimi inkişaf etdirmək üçün kitabxanalardan ayrılmadım. Ümumiyyətlə, heç nə mümkünsüz deyil. İnsan özünə gün ağlamalıdır. Heç kim sənin üçün nə isə etməyəcək. Mən İsveçə gələndə, qalmağa yerim belə yox idi. Otel də rezerv etməmişdim. Hostel tapıb qaldım. Müəyyən çətinliklər olur, amma həll etməyi bacarsan, davamı gəlir. İsveç universitetləri çox güclüdür. Ağır sənaye ölkəsidir. İş çoxdur və işçi qüvvəsinə ehtiyac da çoxdur. Azərbaycanlılar işləməyi sevən insanlardır, burada iş tapa bilərlər.

 

 

- Əvvəllər mən şirkətlərdə çalışırdım. Hansısa şirkətin işçisi olursan, bir müddət sonra düşünməyə başlayırsan ki, sərf etdiyin vaxt və əməyin qarşılığı olaraq aldığın maaş nə dərəcədə ədalətlidir? Maaşım məbləğ olaraq İsveç üçün çox yaxşı idi. Yenə də düşündüm ki, işimə görə daha az pul verilir. İstəyirdim istirahət etmək üçün vaxtım qalsın. Onun bir yolu şirkətləşmək idi. Konsaltinq şirkəti kimi qeydiyyatdan keçdim, öz şirkətim vasitəsilə konsaltinq xidməti göstərirəm. Saata görə ödəniş alıram. Bir aktyorun teatrı deyirlər. Mənim şirkətim də bir nəfərlikdir. Bu formada işləmək mənə rahatdır.

 

 

- Özümə əvvəl aldığım qədər maaş təyin edirəm. Çünki maaş verəndə 60 faizi qədər də dövlətə vergi ödəməlisən. Şirkətin pulunu qocalığıma saxlamağa və investisiya etməyə meylliyəm.

 

 

- Bir dostum var, həm də iş şərikimdir. İlk dəfə o mənə belə bir yatırımdan danışdı. Onunla birlikdə alman şirkəti olan "Datamin”ə investisiya etdik. İkinciyə - "RoadBird”ə isə özüm tək yatırım etdim. Təsisçilər yatırım edən şəxslərlə vaxtaşırı görüşlər keçirir, görülən işlər və nəticələrlə bağlı məlumatlar verirlər. Bu görüşləri çox intizamlı şəkildə keçirirlər. "Linkedin”də mələk investor olduğumu qeyd edəndən sonra yazanlar çox oldu. Böyük qisminin ideyaları var, yatırım etməyimi istəyirlər. Süni intellekt və fintex informasiya texnologiyaları üzrə layihələri nəzərdən keçirməyə çalışıram. Mələk investisiya elədir ki, anlıq qərar vermirsən. Yatırım təsisçisi ilə görüşürsən, layihələrinin təqdimatını edirlər. Sən də analiz edirsən, sonra qərar verirsən. Risklidir, bilirəm ki, bu yatırımlar sıfırlana da bilər. Yenə də risk etməyi gözə alıram.

 

 

- Mən insanların xoşbəxtlikdən depressiyaya düşməsi yanaşmasına inanmıram. İsveçin havası ilə əlaqədar depressiyaya düşməyin mümkün olduğunu bilirəm. 2002-ci ilə kimi günəşli ölkədə yaşamışam. Hətta yay çox isti olardı, günəşi sevməzdim. İsveçə gələndə sevindim ki, soyuq ölkəyə gəlmişəm. Amma elə soyuq və qaranlıq havasına görə 2010-cu ildə ilk dəfə depressiyaya düşdüm. Oktyabr ayına depressiya ayı deyirlər. O ayı atlatdınsa, hər şey yaxşı olacaq. Mən də həmin ay depressiyaya düşmüşdüm. Stokholmda yaşayıram. İsveçdə günəşin ən çox çıxdığı şəhərdir. Günəşin çıxması hələ havanın isti olması demək deyil. Burada yay 2,5 ay olur. Ən yüksək isti də 30-35 dərəcədir. Keçən il o belə olmadı. İnsanın depressiyaya düşməyində havanın soyuqluğunun və qaranlıq gecənin uzun olmasının böyük təsiri var.

 

 

- Oldu. Mən İsveçə gələndə, ən çox istədiyim yaxşı təhsil almaq idi. Dəyərli təhsil aldığımı gördüyüm üçün çox xoşbəxt oldum. Pandemiyada daha da əmin oldum ki, nə yaxşı ki, İsveçi seçmişəm. Pandemiyanın ən pik vaxtında İsveçdə heç bir restoran bağlı deyildi, hava limanları işləyirdi, hara istəsən gedə bilərdin. Almaniyada hər yer bağlı idi. Mən isə hər yerə gedə bilərdim. Mənim üçün azadlıq çox önəmlidir. Azadlıq olanda, insan xoşbəxt olur.

 

 

- (Gülür) İsveçə gəlmək istəyəndə valideynlərim mənə icazə vermirdilər. Düşünürdülər ki, getsəm, dönməyəcəyəm. Mən də demişdim ki, oxuyub dönəcəyəm. Həmin vaxt dönmək fikrində idim. İsveçə gələr-gəlməz iş tapdım, dedim ki, bəlkə heç dönməyim. Zaman-zaman dönməklə bağlı fikrim dəyişirdi. 2 dəfə Azərbaycana qayıtmaq şansım oldu, amma hər birində maneə çıxdı. Düşündüm ki, qismət deyil.

 

 

- Tək gənclər yox, hamımızın çox oxumağımız lazımdır. Öz üzərimizdə çox işləməliyik. Kitab oxumaqla yanaşı, texnologiyanın inkişafı ilə ayaqlaşmaq da çox önəmlidir. Əks halda geri qalacağıq. Deyl Karnegi, Karl Saqan kimi müəlliflərin yazdığı elm mövzusunda bacarıqlar və vərdişlər haqqında kitabları oxumağı hamıya tövsiyə edirəm. ChatGPT, Midjourney.com kimi saytlardan da bəhrələnməyə cəhd etsinlər.