Dünən "iTicket" onlayn bilet satışı platformasında problemlər yaranıb. Bu barədə bütün internet xəbər resurslarında məlumat yayılsa da, təəssüf ki, iTicket.az onlayn bilet satışı platforması susamağa üstünlük verdi. 

Nə buna görə üzr istədi, nə də problemin nədən qaynaqlandığını açıqladı. Bu da öz növbəsində iTicket.az onlayn bilet satışı platformasının fırıldaqçılarla əlbir olması şübhəsini yaradır. 

Belə ki, UEFA Çempionlar Liqasının "Qarabağ" (Azərbaycan) - "Viktoriya" (Pilzen, Çexiya) oyununa bilet satışı başlayan kimi platformanın çökməsi və guya yaranan texniki problem aradan qaldırılandan sonra 5-15 manatlıq biletlərin tükənməsi, 30 manatlıq biletlərin də 90%-inin satılması, satışda yalnız 75 və 100 manatlıq biletlərin qalması dediklərimizi sübut edir.

Belə çıxır ki, iTicket.az saytı vasitəsilə 25000 bilet 3 saata satılıb, özü də çökmüş, işləməyən sistemlə! 

Eyni hal fərqli şəkildə "Qarabağ" - "Ferentsvaroş" (Macarıstan) matçında da baş vermişdi. Bu matçdan əvvəl də "iTicket platformasında bilet satışının bitdiyi göstərilsə də, "qara bazar"da 5 və 15 manatlıq biletlər 3 qat bahasına satışa çıxarılmışdı. Bu dəfə də "Qarabağ" - "Viktoriya" oyununa biletlər "qara bazar"da 3 qat bahasına satılır. 

Qeyd edək ki, sosial şəbəkələrdə bilet satışı ilə bağlı xeyli narazılıqlar yaranıb.