Bakıda 90-a yaxın park tipli məhəllələr yaradılıb.

Valyuta.az Trend.az-a istinadən xəbər verir ki, bu barədə sorğuya cavab olaraq Bakı Şəhər İcra Hakimiyyətindən (BŞİH) bildiriblər. 

Qeyd olunub ki, sözügedən işlər IDEA İctimai Birliyinin təsisçisi və rəhbəri Leyla Əliyevanın təşəbbüsü ilə həyata keçirilən "Bizim həyət" layihəsi çərçivəsində baş tutub.

Layihənin əsas məqsədi Bakı həyətlərinin ekoloji cəhətdən təmiz və abad edilməsi, şəhər ekologiyasının sütununu təşkil edən yaşıllıqların bərpası, sağlam həyat tərzinin formalaşdırılması, sakinlər üçün təhlükəsiz və rahat yaşam şəraitinin yaradılmasıdır.

Park tipli məhəllələrdə sakinlərin istək və maraqları nəzərə alınaraq, həyətdə yeni liftlər, işıqlandırma dirəkləri, təhlükəsizlik kameraları quraşdırılır, binaların fasadları, dam örtükləri və giriş hissələri təmir olunur.

Əlavə olunub ki, sözügedən layihənin Bakının bütün rayonlarında həyata keçirilməsi nəzərdə tutulur. Bununla əlaqədar, paytaxtımızın abadlaşdırılmaya ehtiyacı olan həyətlər barədə məlumat və tövsiyələrin IDEA İctimai Birliyinə təqdim edilməsi xahiş olunur.