Qarşıdan qış ayları gəlir. Havaların soyuması həm də qış turizmi mövsümünün başlanması deməkdir. Azərbaycanda son illər qış turizminin inkişafı istiqamətində də müəyyən işlər görülüb. 

Görəsən, qarşıdan gələn qış mövsümünə hazırlıq nə səviyyədədir? Xarici və yerli turistləri qış turizmi üzrə hansı yeniliklər gözləyir?

Valyuta.az-a açıqlamasında Dövlət Turizm Agentliyinin mətbuat xidmətinin rəhbəri Gülnar Mustafayeva bildirir ki, Azərbaycanda hava şəraitindən asılı olaraq dekabrın 15-dən etibarən qış mövsümünə start veriləcək: 

“Qış mövsümündə də təbiət, mədəni, sağlamlıq, qastronomik və digər ənənəvi turizm istiqamətləri üzrə işlər aparılır. Hazırda ölkə üzrə 3 əsas qış turizm mərkəzi - “Şahdağ” Turizm Mərkəzi, Tufandağ Qış-Yay Turizm Kompleksi və Naxçıvan Muxtar Respublikasında yerləşən Ağbulaq İstirahət Mərkəzi fəaliyyət göstərir. Qış turizm destinasiyalarına daha çox MDB ölkələri və Yaxın Şərq regionundan gələn turistlər üz tutur”. 

Həmsöhbətimiz deyir ki, gələn ilin qış mövsümündə Azərbaycanda xizək alpinizmi üzrə beynəlxalq yarış keçiriləcək: 

“Müasir infrastruktura malik qış turizm mərkəzlərinin mövcudluğu ölkəmizdə qış idman növləri üzrə beynəlxalq tədbirlərin keçirilməsinə şərait yaradır. Azərbaycan 2024-cü ildə Beynəlxalq Xizək Alpinizmi Federasiyasının Plenar Assambleyasına və xizək alpinizmi üzrə beynəlxalq yarışa ev sahibliyi edəcək”.

G. Mustafayeva qeyd edir ki, işğaldan azad edilmiş Kəlbəcər və Laçında da qış turizmi mərkəzləri yaradıla bilər: 

Kəlbəcər və Laçın rayonları qış turizmi üzrə geniş potensiala malikdir. Qış aylarında havanın temperaturu, yağıntılı və qarlı günlərin sayı, relyef, dağın hündürlüyü və meylliliyi kimi amillər nəzərə alınaraq bu ərazilərdə qış turizm mərkəzlərinin yaradılması məqsədəuyğun hesab edilə bilər. Xüsusilə Kəlbəcərin sağlamlıq turizm potensialı da nəzərə alınaraq turizm resurslarının bir ərazi ətrafında paralel inkişafı müxtəlif seqmentli turistlərin cəlb olunmasına, həmçinin beynəlxalq praktikada olduqca geniş istifadə olunan sağlamlıq turizmi və dağ-xizək mərkəzlərinin birlikdə turizm klasteri formalaşdırmasına şərait yarada bilir”. 

Ramiz