İstanbul valiliyi avqustun 17-də çimərliklərdə, parklarda, piknik və istirahət məkanlarında spirtli içkilərin istifadəsinə qadağa qoyulmasını tələb edən təkliflə çıxış edib. Təklifə əsasən, sadalanan yerlərdə spirtli içki qəbuluna görə 620 türk lirəsi cərimə nəzərdə tutulur.  

Buna səbəb isə sərxoş insanların əlbəyaxa davalarının və digər asayişin pozulması hallarının artması ilə bağlı şikayətlər olub. 

Sirr deyil ki, Azərbaycanda da sözügedən istirahət məkanlarında geniş şəkildə spirtli içkilərdən istifadə olunur. Nəticədə həmin məkanlarda asayişin pozulması halları da intensiv xarakter alır. 

Bəs Azərbaycanda da oxşar addım atıla bilərmi?

Sosioloq Əhməd Qəşəmoğlu Valyuta.az-a açıqlamasında bildirib ki, İstanbul valiliyinin sözügedən təklifi Azərbaycanda da həyata keçirilməlidir:

“Dənizkənarı ərazilər, çimərliklər, parklar, meşə kənarları deyil ki, orada spirtli içkilər qəbul edəsən. Belə məkanlarda spirtli içki qəbul edən şəxsin dənizdə batmaq təhlükəsi daha yüksəkdir. Ona görə də çimərliklərdə spirtki içki qəbulu təhlükəsizlik qaydalarını pozmaq kimi qiymətləndirilə bilər. 

İkinci tərəfdən, insanlar çimərliklər, parklar, istirahət mərkəzlərinə istirahətə gəlir. Spirtli içki qəbul edənlər isə hay-küy salmaq və hətta dava-dalaşa meylli olurlar. Bununla da onlar insanların istirahət hüququnu pozurlar. Yəni başqalarının istirahətinə maneə olmamaq və təhlükəsizlik baxımından Azərbaycanda da çimərliklər, parklar və istirahət məkanlarında spirtli içkilərin qəbulu qadağan olunmalıdır”. 

Amma həmsöhbətimiz bu istiqamətdə addımın qəfil atılmasını məqsədəuyğun saymır:

“Bunun üçün əvvəlcə bir neçə ay müddətində televiziyalarda mövcud problemləri qabartmalıyıq, ardınca da ictimai rəyi prosesə hazırlamalıyıq”.  

Ramiz