Səfərin ikinci günündə türkdilli ölkələrdən olan jurnalistlər Sakaryanın turizm bölgəsi olan Sapancaya səfər edib.

 

Sapanca Sakarya vilayətinə daxil olan bir rayondur. Şimalda Sapanca gölü, şərqdə Arifiye, cənubda Samanlı Dağları, Geyve və Pamukova rayonları, qərbdə İzmitlə sərhəddir. Sahəsi 119 km², dəniz səviyyəsindən hündürlüyü 36 m-dir. Sakaryanın ən kiçik səth sahəsinə və ən yüksək əhali sıxlığına malik rayonudur.

 

İqlimi Aralıq dənizi iqlimi ilə Qara dəniz iqlimi arasında keçiddir. Ən çox yağıntının olduğu fəsil qış, ən az yağıntı isə yaydır. Yayı isti və quraq keçir, nisbi rütubət yüksəkdir. Burada qeydə alınan ən aşağı temperatur -11.2, ən yüksək temperatur isə 40.2 dərəcə olub.

Sapancada hər an hava dəyişikliyinin şahidi ola bilərsiniz. Anidən yağış yağır, qısa müddət sonra Günəş görünür və ya qat duman ətrafı bürüyür.

 

Bilinən yazılı sənədlərə görə, eramızdan əvvəl 1200-cü ildə Frigiyalıların bölgəyə gəlişi ilə bir yaşayış məntəqəsi kimi qeyd edilən Sapanca, gerçək mənada eramızdan əvvəl 378-ci ildə Bitiniya Krallığı tərəfindən qurulub. İlk dəfə 391-ci ilə aid bir Lazca mənbədə Siphonensis Lacus adına rast gəlinir. Rayon Şərqi Roma İmperiyası dövründə Buanes, Sofhan və Sofhange adlanırıb.

1075-ci ildə Anadolu səlcuqlarının Sapanca və ətrafına gəlişi ilə bölgə Ayan və Ayanköy adlandırılmağa başlayıb. Səlib yürüşlərindən sonra bölgə yenidən Bizansa keçib.

 

Sapanca gözəl təbiəti və iqlimi ilə Türkiyənin ən çox turist cəlb edən bölgələrindən biridir. Ətraf şəhərlərə, xüsusən də İstanbula, gölə və yaşıllığa yaxın olması səbəbindən son vaxtlar qısa müddətli tətillər üçün rayona üstünlük verilir. Xüsusilə gölün ətrafında qurulan turizm obyektləri ilə gəlirlər günü-gündən artır. 1999-cu ildə baş verən zəlzələdən sonra göl kənarındakı obyektlərin yararsız hala düşməsi nəticəsində tənəzzülə uğrayan rayonda turizm son illərdə canlanmağa başlayıb. Xüsusilə rayon ətrafında Maşukiye və Kırkpınar kimi yaşayış məntəqələrində çoxlu istirahət kəndləri və bağ evləri yaradılıb. 

Son illərdə inkişaf edən digər bölgə Maşukiye yaxınlığındakı Samanlı dağlarının ən hündür yeri olan Kartepedir. Burada yaradılan yeni obyektlərlə qış turizmi də inkişaf etməyə başlayıb.

 

Tarixə abidələrə üstünlük verən turistlər burda Bizans sarkofaqları və qəbir daşları, Vecihi qapısı, Rəhimə Sultan, Rüstəmpaşa, Həsən Fehmi Paşa və Cədid məscidlərini ziyarət edə bilər.

 

2020-ci ilin siyahıya alınmasına əsasən, Sapanca əhalisinin sayı 43.018 nəfərdir. 

 

 

Son illər ərzində həyata keçirilən layihələrlə Sapanca bir fəsil deyil, ilin 365 günü turistləri qəbul edə bilir. Bunun nəticəsidir ki, yay aylarında və həftə bölgədə əhalinin sayı 3-4 dəfə artır. 

 

Sapanca son illər ərəb turistlər üçün də cazibə mərkəzinə çevrilib. Dəniz və istiyə üstünlük verməyən minlərlə ərəb hər gün gözəl təbiəti ilə insanı valeh edən Sapancaya üz tutur.