İnstaqram sosial şəbəkəsindəki qısa videolarda TikTok da daxil olmaqla, bir sıra tətbiqlərin loqotiplərindən istifadə məhdudlaşdırılır. Video sözügedən loqoları ehtiva etsə, İnstaqram həmin istifadəçiyə görüntü tövsiyələrini dayandıracaq.

Bu barədə İnstaqramın hesabatında məlumat verilib. Bildirilib ki, qısa videolar üçün tətbiqin öz qalereyasından istifadə tövsiyə olunur. Məqsəd isə loqotipləri görünən digər tətbiqlərdən aşağı keyfiyyətli, təkrar emal edilmiş videoların yüklənməsinin qarşısını almaqdır.

İnstaqramın bu tövsiyəsi sosial şəbəkə istifadəçiləri tərəfindən haqsız tələb kimi anlaşılıb. Qeyd edilib ki, heç də hər kəs loqo olmadan video hazırlamağa imkan verən ödənişli tətbiqlərdən istifadə iqtidarında deyil. Həmçinin istifadəçilərin videolara əlavə etmək istədikləri bəzi effektlərin İnstaqramın öz kamerasında olmadığı qeyd edilib (Ted.Az).