ABŞ-ın texnologiya nəhəngi "Apple "Siri" səsli köməkçisinin istifadəçi məxfiliyini pozduğu iddiası ilə bağlı açılmış məhkəmə işində razılaşmaya gedərək 95 milyon dollar təzminat ödəməyi qəbul edib.

Valyuta.az xəbər verir ki, Kaliforniya Şimal Bölgə Məhkəməsinin hakimi Ceffri Uayt tərəfindən təsdiq edilməli olan ilkin razılaşma Oklenddəki federal məhkəməyə təqdim edilib.

İddia "Siri"nin istifadəçilərin icazəsi olmadan qeydə alınmış danışıq məlumatlarının üçüncü tərəflərlə paylaşıldığı iddiası əsasında açılmışdı.

Razılaşmanın təsdiqlənəcəyi halda, 2014-cü il sentyabrın 17-dən 2024-cü il dekabrın 31-dək "Siri" xüsusiyyətli cihazlardan istifadə edən ABŞ vətəndaşları cihaz başına 20 dollara qədər təzminat ala biləcəklər.

"Siri" 2011-ci ildə "iPhone 4S" modeli ilə təqdim edilib. İstifadəçilərin "Hey Siri" əmri ilə cihazlarını əllərsiz idarə edə bilməsini təmin edən bu xüsusiyyət isə 2014-cü ildə istifadəyə verilmişdi.

Paşa Məmmədli