“Google” “Kairos Power” adlı nüvə enerjisi şirkəti ilə müqavilə imzalayıb. Bu müqavilə çərçivəsində şirkət süni intellekt üçün nüvə enerjisindən istifadə etməyə başlayacaq.

Valyuta.az-ın xəbərinə görə, süni intellekt sektorundakı inkişaflar nəhəng şirkətlərin enerji ehtiyaclarını artırıb. Cəmi bir neçə həftə əvvəl ABŞ-lı texnologiya nəhəngi “Microsoft”un süni intellekt araşdırmaları üçün nüvə enerjisi kartını oynadığı bildirilmişdi. 

Bu dəfə də oxşar hərəkət “Google”dan gəldi. Şirkət “Kairos Power” adlı nüvə enerji şirkəti ilə müqavilə imzalayıb. Bu müqavilə çərçivəsində “Google” “Kairos Power”a aid kiçik reaktorlardan enerji təmin edəcək. Bununla belə, “Google” və “Kairos Power” arasında müqavilənin maliyyə tərəfi ilə bağlı heç bir məlumat paylaşılmayıb.

“Kairos” “Google” üçün modul reaktor dəstləri hazırlayacaq

“Karios Power” və “Google” arasında razılaşma adət etdiyimiz atom elektrik stansiyalarından bir az fərqli olacaq. “Kairos” “Google” üçün kiçik və modul reaktor dəstləri hazırlayacaq. Bu dəstlərdən birincisinin 2020-ci illərin sonunda tamamlanaraq istifadəyə verilməsi gözlənilir. Verilən açıqlamalara görə, 2035-ci ilə qədər bu reaktorlar 500 meqavat enerji istehsal gücünə sahib olacaq. 

Verilən açıqlamalara nəzər saldıqda hər iki tərəfin bu razılaşmadan razı qaldığını görürük. 

“Biz inanırıq ki, nüvə enerjisi bizim təmiz inkişafımızı dəstəkləməkdə və süni intellektin inkişafına kömək etməkdə mühüm rol oynayacaq” - “Google”un bəyanatında deyilir. 

Karios Power CEO-su da “Biz bunu həqiqətən vacib bir tərəfdaşlıq kimi görürük” ifadələrini qeydedib.

Əvəz Həsənov