"Telegram"ın 2023-cü ildə gəliri 342 milyon dollar, əməliyyat xərcləri 108 milyon dollar, ümumi zərər isə 173 milyon dollar təşkil edib. 

Valyuta.az bu barədə "Financial Times"a istinadən xəbər verir.

Nəşr yazır ki, zərər "Toncoin" də daxil olmaqla "Telegram" balansındakı rəqəmsal aktivlərin dəyərinin artması ilə qismən kompensasiya edilib.

Platformanın özü hesabatlarını dərc etmir. FT materialında qeyd edildiyi kimi, 2023-cü ildə "Telegram"ın rəqəmsal aktivlərinin ümumi dəyəri təxminən 400 milyon dollar təşkil edib və 2024-cü ildə şirkət "Toncoin"-i təxminən 244 milyon dollara satıb. "Tonvoin"in dəyəri 20% azalaraq 5,46 dollara enib.

FT ekspertlərə istinadən yazır ki, Fransada Pavel Durova qarşı başladılan təhqiqat "Telegram"ın yaxın iki il ərzində IPO keçirmək planlarını poza bilər, çünki investorlar və reklamçılar platformaya investisiya qoymaq istəməyəcəklər. Yazda Pavel Durov bildirmişdi ki, şirkətdə pay almaq istəyən investorlar onu 30 milyard dollar dəyərində qiymətləndiriblər.

İyul ayına qədər "Telegram"ın aylıq auditoriyası 950 milyon nəfərə çatıb. "TechCrunch" xəbər verir ki, Pavel Durovun həbsindən sonra ilk günlərdə bütün dünyada iOS platformasında yükləmələrin sayı 4% artıb. Fransada bu günlərdə tətbiq sosial şəbəkələr arasında yükləmələrə görə birinci yerə, ümumi siyahıda isə üçüncü yerə yüksəlib.

Həbsindən dörd gün sonra, avqustun 28-də Paris məhkəməsi Pavel Durovu 5 milyon avro girov müqabilində polis nəzarəti altında azad edib. 

Paşa Məmmədli