"Microsoft" ekspertləri "Qualcomm ARM" prosessorları ilə hazırlanacaq noutbukların "Apple M3" çipli "MacBook Air"dən bir çox cəhətdən daha məhsuldar olacağına inanırlar. 

Valyuta.az xəbər verir ki, bu barədə mənbələrə istinadən "The Verge" məlumat yayıb.

"Microsoft" inanır ki, "Qualcomm"un "Snapdragon X Elite" mobil çipi ilə təchiz edilmiş noutbuklar nəinki bərabər olacaq, həm də xüsusilə yüksək CPU və neyron hesablama performansı tələb edən tapşırıqlarda, eləcə də "MacBook"da "Rosetta 2"dən istifadə edərkən tətbiq emulyasiyasında "Apple"ın noutbuklarını üstələyəcək.

"Microsoft" "Qualcomm" prosessorları ilə təchiz edilmiş yeni "Surface Pro 10" və "Surface Laptop 6" modellərini "Windows"un süni intellekt xüsusiyyətlərinə çıxışı təmin edən "Kopilot" köməkçisi ilə inteqrasiya olunmuş yeni nəsil cihazlar kimi yerləşdirir.

Əvvəlki sızmalara görə, "Snapdragon X Elite" indiyədək bəzi testlərdə yalnız "Apple M2" və "Intel Core Ultra 7" çiplərini üstələyib.

Yeni prosessorlu ilk noutbuklar haqqında ətraflı məlumat mayın 20-də, "Microsoft"un təqdimatı günü ortaya çıxacaq. Daha sonra digər noutbuklar, o cümlədən "Samsung"un noutbukları "Qualcomm" çipləri ilə istehsal olunmağa başlayacaq.

Paşa Məmmədli