Kod məlumatı tələb etmədən sənaye layihələri hazırlamağa fokuslanan proqram platforması olan “Sitemate” yeni investisiya aldığını açıqlayıb.

Valyuta.az xəbər verir ki, “Sitemate” tərəfindən verilən məlumata görə, şirkət A seriyası investisiya turunda 18 milyon dollar investisiya alıb. “Sitemate” tərəfindən paylaşılan məlumata görə, yeni investisiya şirkətin məhsula yönəlmiş mühəndislik araşdırmalarına diqqət yetirməsi və müştəri bazasını genişləndirməsi üçün istifadə ediləcək.

“Sitemate”in 18 milyon dollarlıq investisiya turuna “Blackbird” rəhbərlik edirdi. İnvestisiya raundunun digər iştirakçılarına “Shearwater Capital” və “Marbuck” daxildir.

Xatırladaq ki, “Sitemate” 2023-cü ilin noyabrında 4,7 milyon dollarlıq investisiya almışdı. 18 milyon dollarlıq yeni investisiya ilə bu günə qədər Sitemate təşəbbüsü tərəfindən alınan ümumi investisiya 28 milyon dolları keçib.

2015-ci ildə Hartley Pike və Samuel McDonnell tərəfindən Sidneydə qurulan “Sitemate” mahiyyətcə “SaaS” platformasıdır. Şirkətlərə heç bir kodlaşdırma məlumatı tələb etmədən layihələrini rəqəmsallaşdırmağa imkan verən Sitemate, istifadəçilərinə müxtəlif platformalar təqdim edir.

4 fərqli platformaya sahib olan şirkət “Dashpivot”, “Gearbelt”, “Flowsite” və “Sitemate App” müştərilərinə sistem və aktivlərin idarə edilməsi, eləcə də inteqrasiya və mobil tətbiqlərdə dəstək təklif edir. “Sitemate”in verdiyi məlumata görə, şirkət son bir ildə sürətlə böyüyərək işçilərinin sayını 70-dən 140-a çatdırıb.

Qeyd edək ki,  Sitemate ötən ilin avqustunda “Nomad Fleet” startapını 2 milyon dollara alıb. Satın alındıqdan sonra “Sitemate” “Nomad Fleet” adını “Gearbelt” olaraq dəyişdirdi və onu istifadəyə verdi.

Əvəz Həsənov