"Microsoft" və "Quantinuum" yeni texnologiya ilə kvant kompüterlərinin səhvlərini minimuma endirməyi bacardıqlarını açıqlayıb.

Valyuta.az xəbər verir ki, kvant kompüterləri ənənəvi cihazlarla müqayisədə həm performans, həm də sürət baxımından böyük vədlər verir. Ancaq çoxlu səhvlərə yol verməsi yeni texnologiyanın qarşısındakı ən böyük maneələrdən biridir. Tədqiqatçılar lazım olduğundan daha çox qubit (Quantum bit) əlavə və səhvlərin düzəldilməsi üsullarından istifadə etməklə bu problemi aradan qaldırmağa çalışırlar. Kvant bitləri mənasını verən qubitlər kvant kompüterlərində əsas məlumat vahidini təmsil edir. Klassik kompüterlərdəki bitlər 0 və ya 1 kimi yalnız iki vəziyyətdən birində olursa, qubitlər eyni anda birdən çox vəziyyətdə ola bilər. Supermövqe adlanan bu fenomen kvant hesablamalarının əsasını təşkil edir.

Ətrafdakı ən kiçik dəyişikliklə belə səhvlərə yol verən qubitlərin bu problemini həll etmək üçün "Microsoft", "Quantinuum"un fiziki qubitlərinə yazdığı səhv düzəliş alqoritmini tətbiq edib. Nəticədə 30 fiziki qubitdən 4 qubit əldə olunub. Qubit virtualizasiya sistemi adlanan bu üsulla tədqiqatçılar kvant kompüterində heç bir səhvsiz 14 min təcrübə həyata keçirdiklərini açıqlayıblar. Digər testlərlə elm adamları səhv nisbətinin 100 mindəbir olduğunu təyin ediblər.

"Microsoft"un strateji əlaqələr və texnologiyalar üzrə vitse-prezidenti Ceyson Zander "Reuters"ə açıqlamasında, "Biz bir səhv olmadan 14 mindən çox ayrı-ayrı təcrübə keçirdik. Bu, qeydə alınmış hər şeydən 800 dəfə yaxşıdır" - sözlərini söyləyib. 

"Microsoft" yaxın aylarda bu texnologiyanı bulud hesablama müştərilərinə təqdim etməyi planlaşdırdığını bildirib.

"Quantinuum"un kompüter mühəndisləri və "Microsoft"un alimlərindən ibarət komanda işlərini təfərrüatlandıran məqalə də dərc edib. Kvant kompüterləri sağlamlıq, ətraf mühit və süni intellekt kimi müxtəlif sahələrdə böyük irəliləyişlərə yol açmaq potensialına malikdir. Həm performans, həm də sürət baxımından klassik kompüterləri çox üstələyə bilən bu texnologiya, mövcud cihazlarla milyonlarla il çəkəcək elmi hesablamaları daha tez həll edə bilər. Məsələn, kimyəvi reaksiyaların necə baş verdiyini modelləşdirmə potensialına malik olan kvant hesablamaları dərmanlar hazırlayarkən laboratoriyada reaksiyaların aparılması ehtiyacını aradan qaldıra bilər.

Elmir