Texnologiya sənayesindəki yenilikləri ilə tanınan "Apple", rəqibləri "Samsung", "Oppo" və "Motorola" kimi qatlana bilən smartfonu hələ satışa çıxarmayıb.

Valyuta.az xəbər verir ki, buna baxmayaraq texnologiya nəhənginin son patenti "Apple"in telefon dünyasında bir ilk olacaq "yeriyə bilən" "iPhone" hazırlamağı planlaşdırdığını göstərir. ABŞ şirkətinin patent sənədlərində bir ox ətrafında əyilən nazik və çevik ekrana malik rulon formalı "iPhone" dizaynı bütün detalları ilə görünüb. 

"Apple"in dizaynında ekranın üzərində qoruyucu şüşə təbəqəsi, həmçinin ekranı cızıqlardan və digər zədələrdən qorumaq üçün ləkə, duman əleyhinə, əks etdirici və antistatik təbəqələr kimi strukturlar yerləşdirildiyi görünürdü.

"iPhone" 15-i sentyabrda təqdim edən şirkət yuvarlana bilən smartfon istehsal etməyə qərar verərsə, bu, 2024-cü ilə qədər olmayacaq. Digər tərəfdən, "Apple"in keçmişdə real dünyada heç vaxt istifadə edilə bilməyən çox sayda patent müraciəti məlumdur. Bununla belə, son patent müraciətindəki çertyojlar onu göstərir ki, yuvarlana bilən ekran rəqəmsal təsvirlərin forma və rəngini təyin edən piksel massivinə malikdir. "iPhone" yuvarlananda ekran ox ətrafında əyilir və silindrə çevrilir. "Apple" yuvarlanma və açılma prosesində onu qorumaq üçün cihazın içərisinə bir neçə qat əlavə etməyi nəzərdən keçirir. Patentə görə, telefonun daxili hissəsindəki örtüklər təyyarə komponentləri, idman malları və yapışdırıcılar kimi müxtəlif tətbiqlərdə istifadə olunan çoxyönlü plastik material hesab edilən poliimiddən ibarət olacaq. Ən incə xarici təbəqə isə plastik torbalarda, geyimlərdə və teflon örtüklü qablarda olan polimerdən hazırlanacaq. Sənəddə həmçinin qeyd olunur ki, bu laylı strukturlar şüşə təbəqənin xarici səthinə dərin cızıqların nüfuz etməsinin qarşısını alır. Daha sərt polimer təbəqə səthi cızılmadan qoruyur, beləliklə, ekranda görünən dəyişiklikləri və ya bulanıqlığı minimuma endirir. Digər tərəfdən, patentlər məhsulun faktiki satışa çıxarılacağına zəmanət olmasa da, şirkətin tədqiqat və təkmilləşdirmə səyləri haqqında dəyərli məlumat verir.

"Apple"in yuvarlana bilən smartfon texnologiyasını kəşf etməsi şirkətin sərhədləri aşmaq və potensial olaraq mobil cihazların gələcəyini formalaşdırmaq əzmini nümayiş etdirir.

Elmir