Tovuz rayon Suvarma Sistemləri İdarəsinin bu gun keçirdiyi satınalma müsabiqələrindən birini böyük məbləğdə vergi borcu olan  “Art-Proje” MMC qazanıb.

Valyuta.Az xəbər verir ki, məbləği 61 min 453 manat 34 manat olan tender LOT_7_Nasos aqreqatlarının ehtiyyat hissələri və elektrik avadanlıqlarının satın alınması ilə bağlı olub. 

Qeyd edək ki, 3 gün əvvəl Şəki Subartezian Quyularının İstismarı İdarəsinin keçirdiyi cari təmiri üçün nasos aqreqatlarının və elektrik avadanlıqlarının ehtiyat hissələrinin satınalınması müsabiqəsinin qalibi də “Art-Proje” MMC olmuşdu. Həmin tenderin məbləği 208 min 674 manat təşkil edirdi. Valyuta.Az-ın  araşdırmaları zamanı məlum olmuşdu ki, şirkətin martın 12-inə olan vergi borcu 655 min 774 manat 8 qəpik təşkil edib. Bu günə isə şirkətin vergi borcu  436 min 647 manat 55 qəpikdir. Göründüyü kimi, şirkət son 3 gündə vergi borcunu 219 min 126 manat 53 qəpik azalda bilib. 

Bu isə o deməkdir ki, Meliorasiya və Su Təsərrüfatı ASC-nin idarəsi satınalmalar haqqında mövcud qanunvericiliyi son 3 gündə 2 dəfə kobud şəkildə pozub. Qanuna görə, məcburi öhdəlikləri yerinə yetirməyən şirkətlər tenderlərdə iştirak edə bilməz. 

Xatırladaq ki, “Art-Proje” MMC Əhməd Əhmədzadənin rəhbərlik etdiyi qurumdan ən çox tender udan şirkətlərdən biridir. Məsələn, 2010-2017-ci illər arasında keçirilən 51 satınalmanı "Art-Proje" qazanıb. Bunların ümumi məbləği 18 milyon 232 min 507 manat 96 qəpik olub. Maraqlıdır ki, 51 satınalmanın 36-sını Əhməd Əhmədzadənin tabeliyində olan qurumlar keçirib. 

27.06.2019 tarixindən indiyə kimi şirkətlə 16 satınalma müqaviləsi bağlanılıb ki, onlardan 10-nu Meliorasiya və Su Təsərrüfatı ASC-nin tabeliyində olan qurumlar keçirib.

Mediada yayılan məlumatlara görə, Əkram Əliyevin “Hidro-M” MMC adlı daha bir şirkəti var. Həmin şirkətin hüquqi ünvanı Sumqayıt şəhəri, məhəllə 15, ev 3/6, mənzil 34-dur. Hazırda reyestr sənədlərində sözugedən şirkətin qanuni təmsilçisi Valeh Xələfov İsa oğludur. Şirkətin qeydiyyat sənədlərinə son dəfə 26.02.2019  tarixində dəyişiklik edilib. 

2003-cü ildə yaradılan “Hidro-M” MMC də son 10 ildə dövlət satınalmalarını ən çox qazanan şirkətlərdən biri olub ki, əksər satınalmaları da  Meliorasiya və Su Təsərrüfatı ASC keçirib…