Mədəniyyət Nazirliyinin nəzdində fəaliyyət göstərən "Əsaslı Tikinti cə Təchizat" Məhdud Məsuliyyətli Cəmiyyəti (MMC) nazirliyin tabeliyində olan Sumqayıt şəhəri Heydər Əliyev Mərkəzində aparılacaq cari təmir işlərinin satın alınması üzrə elan etdiyi tenderə yekun vurub.

Valyuta.az xəbər verir ki, tenderin qalibi “Koneks Construction” MMC olub. Tərəflər arasında bağlanacaq satınalma müqaviləsinin maliyyə dəyəri 293.260,51 AZN-dir. 

İqtisadiyyat Nazirliyi yanında Dövlət Vergi Xidmətinin reyestr məlumatlarına əsasən, “Koneks Construction” MMC 27 noyabr 2019-cu ildə qeydiyyata alınıb. Şirkətin nizamnamə kapitalı 10 AZN-dir. Hüquqi ünvanı Binəqədi rayonu, Səttar Bəhlulzadə küçəsi, ev 39, mənzil 29-da yerləşən MMC-nin qanuni təmsilçisi Fərzəliyev Mehdi Məhəmmədəli oğludur. 

MMC müxtəlif dövrlərdə öz qanuni təmsilçisini bir neçə dəfə dəyişib. İlk qanuni təmsilçisi Xurşudov Samir Azad oğlu olsa da, daha sonra təmsilçilik Osmanlı Vahid Cuma oğlu və Fərzəliyev Mehdi Məhəmmədəli oğluna keçib. Açıq mənbələrdə Mehdi Fərzəliyev barəsində hər hansı məlumat yoxdur. 

Şirkət bu il dövlət qurumlarının elan etdiyi ümumi dəyəri 10 milyon manatdan çox olan 12 tenderin qalibi olub. Araşdırmamız zamanı məlum olub ki, yumşaq invertar və xüsusi geyimlər satan şirkət həm də təmir-tikinti işləri də aparırmış. 

Bir müddət öncə mediada gedən məlumatlara görə, şirkətin 904 AZN vergi borcu olmasına baxmayaraq, bir neçə tenderin qalibi olub. “Dövlət Satınalmaları haqqında” qanun isə vergi borcu olan şirkətlərin tenderlərdə iştirakını qadağan edir. Şirkətin hazırda vergi borcu yoxdur. 

Şirkətlə bağlı müəmmalardan biri də onun yaranma tarixi ilə bağlıdır. Açıq mənbələrdə qeyd edilir ki, “Koneks Construction” MMC 2016-cı ildən tikinti sektorunda fəaliyyət göstərir. Lakin yuxarıda qeyd etdiyimiz kimi, Dövlət Vergi Xidmətinin reyestr məlumatlarında şirkətin 2019-cu ildə yarandığı qeyd edilib. 2019-cu ildə yaradılan “Koneks Construction” MMC-nin 3 il əvvəl necə fəaliyyət göstərib? Şirkətin nə veb-səhifəsi, nə də əlaqə nömrələri var. Bu baxımdan, yuxarıdakı sualın cavab tapmaq mümkün olmadı.

Davud