Mədəniyyət Nazirliyinin tabeliyində fəaliyyət göstərən “Əsaslı Tikinti və Təchizat” MMC Mədəniyyət Nazirliyi üzrə keçiriləcək tədbir və digər proqramlarda istifadə olunacaq səhnə, səs və işıq avadanlıqlarının təmin edilməsi xidmətlərinin satın alınması ilə bağlı tenderə yekun vurub. 

Valyuta.az xəbər verir ki, tenderin qalibi “Mozg Media Group” MMC seçilib. Tərəflər arasında bağlanacaq satınalma müqaviləsinin maliyyə dəyəri 367 605,4 AZN-dir.

İqtisadiyyat Nazirliyi yanında Dövlət Vergi Xidmətinin reyestr məlumatlarına görə, “Mozg Media Group” MMC 14 iyul 2021-ci ildə qeydiyyata alınıb. Nizamnamə kapitalı 10 AZN olan şirkətin hüquqi ünvanı Bakı şəhəri Nərimanov rayonu, Fətəlixan Xoyski prospekti, ev 120/23, mənzil 27-də yerləşir. MMC-nin qanuni təmsilçisi Mirzəzadə Zaur Mübariz oğludur. 

“Mozg Media Group” MMC barəsində açıq mənbələrdə heç bir məlumat yoxdur. 

Dövlət satınalmalarının elektron portalına yerləşdirilən tender elanlarından məlum olur ki, şirkət satınalma müsabiqələrində fəal iştirak edir. 
Bu arada qeyd edək ki, Mədəniyyə Nazirliyi ötən il “Mozg Media Group” MMC ilə ümumi maliyyə dəyəri 1 018 640 AZN təşkil edən iki satınalma müqaviləsi imzalayıb. Müqavilələr Mədəniyyət Nazirliyi tərəfindən keçiriləcək tədbirlər, festivallar və digər proqramlarda səhnələrin, səs sistemlərinin, işıqlandırma, lazer və digər avadanlıqların icarə xidmətləri ilə XIV Üzeyir Hacıbəyli Beynəlxalq Musiqi Festivalı və "Mədəniyyətin iqtisadiyyatı: Şuşadan inkişaf impulsları" adlı tədbir üçün səhnə avadanlıqlarının quraşdırılması üzrə xidmətlərin satın alınması ilə bağlı olub. 

Şirkətin qanuni təmsilçisi Zaur Mirzəzadə "Azərbaycanfilm" kinostudiyasının prodüseridir. 

Azərbaycanın mədəniyyət naziri Adil Kərimlidir. O, 2023-cü ilin aprelindən bu vəzifədədir. 

Ötən il Dövlət Təhlükəsizlik Xidməti (DTX) Mədəniyyət Nazirliyində əməliyyat keçirib. Əməliyyat nəticəsində qurumun bir neçə yüksək vəzifəli şəxsi saxlanılıb.

Hüseyn