Xarici tələbələr üçün Azərbaycanın hansı təqaüd proqramları var?
Azərbaycanlı tələbələr müxtəlif ölkələrdə təhsil alır və bunların içərisində təqaüd proqramları ilə təhsil alanlar da çoxdur. Müxtəlif ölkələrin təqaüd proqramları çərçivəsində həyata keçirilən təhsil forması var. Bu təqaüd proqramları bəzən tələbənin təhsil haqqını, bəzən həmin ölkədə yaşam xərclərini də qarşılayır.
Maraqlıdır, Azərbaycan dövləti əcnəbi tələbələr üçün hansı təqaüd proqramlarını təklif edir? Bu proqramlar təhsilin hansı pilləsini əhatə edir və təhsil xərcləri ilə yanaşı, digər xərclər də qarşılanırmı?
Valyuta.az-ın sorğusuna cavab olaraq Elm və Ali Təhsil üzrə Dövlət Agentliyindən bildirilib ki, “Təhsil haqqında” Azərbaycan Respublikasının Qanununun 44.1-ci bəndinə əsasən, Azərbaycan Respublikası vətəndaşlarının xarici ölkələrdə, əcnəbilərin və vətəndaşlığı olmayan şəxslərin Azərbaycan Respublikasında təhsilin hər hansı pilləsində təhsil alması və ya ixtisas artırması Azərbaycan Respublikasının tərəfdar çıxdığı beynəlxalq müqavilələrə uyğun olaraq, dövlət tərəfindən müəyyən edilmiş kvota, təhsil qrantı proqramı və təhsil müəssisəsinin, hüquqi və fiziki şəxslərin birbaşa bağladıqları müqavilələr əsasında həyata keçirilir.
“İslam Əməkdaşlıq Təşkilatı və Qoşulmama Hərəkatına üzv dövlətlərin vətəndaşlarının ölkəmizdə təhsili üçün təsis edilmiş təhsil qrantı proqramlarının davamı olaraq Azərbaycan Respublikası Prezidentinin 2023-cü il 8 iyul tarixli 3956 nömrəli Sərəncamı ilə “Heydər Əliyev adına Beynəlxalq Təhsil Qrantı” proqramı təsis edilib. 2024-25-ci tədris ilindən etibarən əcnəbi vətəndaşların “Heydər Əliyev adına Beynəlxalq Təhsil Qrantı” çərçivəsində təhsili nəzərdə tutulur.
Bununla yanaşı, Çin, Macarıstan, Qazaxıstan, Rumıniya və Tacikistan vətəndaşları hökumətlərarası təqaüd proqramları çərçivəsində Azərbaycan ali təhsil müəssisələrində təqaüdlü təhsil ala bilirlər.
Qeyd edilməlidir ki, xarici ölkə vətəndaşları üçün təqaüd proqramları ölkəmizin bir sıra ali təhsil müəssisələri tərəfindən də ayrıca həyata keçirilir” – deyə Agentlikdən məlumat verilib.
Agentlikdən bildirildi ki, əcnəbi tələbələr “Heydər Əliyev adına Beynəlxalq Təhsil Qrantı” proqramı çərçivəsində Azərbaycan Respublikasının ali təhsil müəssisələrində tədris dilinə uyğun hazırlıq kurslarında, bakalavriat (əsas (baza ali) tibb təhsili), magistratura (rezidentura), doktorantura səviyyələri üzrə təhsil ala biləcəklər.
Hökumətlərarası təqaüd proqramları çərçivəsində isə Qazaxıstan vətəndaşları yerli ali təhsil müəssisələrində bakalavriat və magistratura, Çin, Macarıstan, Rumıniya və Tacikistan vətəndaşları isə müvafiq proqram çərçivəsində əlavə olaraq doktorantura səviyyəsi üzrə də təhsil ala bilirlər.
Qeyd edildi ki, təqaüd proqramları əcnəbi tələbələrin müxtəlif xərclərini qarşılayır. Belə ki, “Heydər Əliyev adına Beynəlxalq Təhsil Qrantı” proqramı Azərbaycan Respublikasının hesabına ödənilən təhsil haqqı, viza, qeydiyyat, aylıq təqaüd, tibbi yardım və beynəlxalq nəqliyyat xərclərini əhatə edir.
Hökumətlərarası təqaüd proqramları çərçivəsində əcnəbi vətəndaşların təhsil xərci, tibbi sığorta, yataqxana və aylıq təqaüdü Azərbaycan, beynəlxalq nəqliyyat xərcləri isə göndərən və ya tələbələrin özləri tərəfindən qarşılanır.
Əvəz Həsənov
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay