Argentina hökuməti sənədin qəbuluna nail olmaq üçün özəlləşdirməyə dair qanun layihəsinə daxil edilmiş dövlət şirkətlərinin siyahısını azaldıb. 

Valyuta.az xəbər verir ki, bu barədə “La Nacion” qəzeti məlumat yayıb.

Qəzetə görə, hökumət siyahını 36 şirkətdən 27-yə endirib. Səlahiyyətlilər, xüsusən də zərbxananı, təyyarə istehsalı müəssisəsini və qızıl və gümüş yataqlarını idarə edən bir şirkəti siyahıdan çıxarıblar.

Qanun layihəsinin birinci variantında 41 dövlət şirkəti olub, lakin müxalifətlə danışıqlar zamanı hökumət bir sıra bəndləri, o cümlədən neft-qaz YPF-ni silməyə razılaşıb. Bundan əlavə, düzəliş edilmiş layihəyə əsasən, geostasionar rabitə operatoru ARSAT, ən böyük dövlət bankı Banco Nacin və atom elektrik stansiyasının operatoru Nucleoel trica yalnız qismən özəlləşdirilə bilər.

Hökumət qanun layihəsinin qəbulu üçün bu və digər güzəştlərə getməyə məcbur olub. Yanvarın 31-dən o, parlamentin aşağı palatasında baxılır və iki günlük müzakirələrdən sonra səsverməyə çıxarıla bilməyib.
Argentina hökuməti hərtərəfli islahat qanun layihəsinin ilk variantını keçən il dekabrın 28-də təqdim edib. 600-dən çox maddədən ibarət layihədə digər məsələlərlə yanaşı, vergi amnistiyası, məcburi praymerizlərin ləğvi, etiraz aksiyaları zamanı nəqliyyatın qarşısının alınmasına görə cəzaların artırılması, dövlət şirkətlərinin özəlləşdirilməsi və ixrac rüsumlarının artırılması da yer alıb. Müxalifətlə islahatların müzakirəsi prosesində hökumət iqtisadi islahatlar və etirazçılar üçün cəzaların sərtləşdirilməsi ilə bağlı maddələr də daxil olmaqla, maddələrin təxminən yarısını geri götürüb.

Ötən il dekabrın 10-da vəzifəsinin icrasına başlayan Mayli dövlət başçısı kimi ilk çıxışında ölkədəki vəziyyəti kritik adlandırıb və iqtisadiyyatda şok tədbirlərinin görülməsinin vacibliyini bəyan edib. Libertar siyasətçi hökumətin minimal müdaxiləsinin tərəfdarıdır, inflyasiya ilə mübarizə üçün Argentina Mərkəzi Bankının ləğvini zəruri hesab edir və iqtisadiyyatın dollarlaşmasına imkan verir. 

Nicat