"Azərbaycanda əsasən Türkiyə və Rusiya istehsalı olan 585 əyarlı qızıla tələbat var".

Valyuta.az xəbər verir ki, bunu İqtisadiyyat.az-a açıqlamasında Azərbaycan Zərgərlər Assosiasiyasının sədri Toğrul Abbasquliyev deyib.

Onun sözlərinə görə, Azərbaycanda təqdim olunan məmulatların 50-55%-i yerli istehsaldır, geri qalan hissə isə idxal olunur.

Sədr deyib ki, Azərbaycana qızıl əsasən Türkiyə, İtaliya, Rusiya, Birləşmiş Ərəb Əmirlikləri, Çin, Rusiya, Hindistan, Tailand və digər ölkələrdən idxal olunur: "Amma müşahidələrimizə görə, bunların da içərisində ən çox Türkiyə istehsallı məmulatlar idxal edilir. İkinci sırada isə İtaliyanı qeyd edə bilərik. Oradan 585 və 750 əyarlı məmulatlar gətirilir. 

T.Abbasquliyev həmçinin zərgərlik məmulatlarının son bazar qiymətləri barədə də danışıb: "585 əyarlı qızılın qiyməti 70-75 manatdan, 750 əyarlı məmulatların qiyməti isə 90-95 manatdan başlayır. Bu, qramla satılan qızıl məmulatları seqmentinə aiddir. İkinci seqment isə brend məmulatlardır. Onlarda tələbat əyarına və qramına görə deyil, brendin öz dəyərinə görə qiymət verilir".

Qeyd edək ki, ötən ilin yanvar-noyabr ayları ərzində Azərbaycanda 2 507,9 kq qızıl istehsal edilib. Qızıl istehsalı 2022-ci ilin yanvar-noyabr aylarının göstəricisindən 16,4 % az olub.