“İndiki şərtlər daxilində Azərbaycanda özəl pensiya fondlarının təşəkkül tapması üçün əlverişli mühit yoxdur”.

Bunu Valyuta.az-a açıqlamasında İqtisadi və Sosial İnkişaf Mərkəzinin sədri Rəşad Həsənov Azərbaycanda hələ də özəl pensiya fondlarının yaradılmamasına münasibət bildirərkən deyib.

Ekspert bildirib ki, orta və uzun müddətli dövrdə Azərbaycan vətəndaşı yığımlarla bağlı həyat planlaması aparmaq imkanında deyil:

"Özəl maliyyə institutlarına etibarlılıq səviyyəsi də çox aşağıdır. Əmanətlərin belə 80 faizindən çoxu qısa müddətli dövrə aid əmanətlərdir. Bu da o deməkdir ki, Azərbaycan insanı uzun müddətli dövrdə riskləri proqnozlaşdıra bilmir. Özəl pensiya fondu isə 20-40 il müddətində proqnozlaşdırma, planlama və quruma etibarlılıq tələb edən mexanizm olduğu halda təşəkkül tapır”. 

Ekspertə görə, digər məsələ vətəndaşların imkanı ilə bağlıdır:

“Ölkədə hələlik vətəndaşların yığım imkanları məhduddur. Onlar məsələyə “nağd olsun, soğan olsun” prizmasından baxır və yalnız bu günki cari problemlərlə məşğuldurlar. Əhalinin böyük əksəriyyətinin prosesdə iştirak etməməsilə fond lazım olan likvidliyi əldə edə bilməyəcək. Çünki azsaylı iştirakçı ilə fondun fəaliyyəti səmərəli olmayacaq”. 

R. Həsənov deyir ki, maliyyə bazarının zəif inkişafı da prosesə mənfi təsir göstərir:

“Özəl pensiya fondunun mənfəəti topladığı vəsaiti bazarda yerləşdirməklə gəlir əldə etməkdən formalaşır. Bu prosesdə çətinlik çəkəcəyi və əmanət faizləri 8-10 faiz arasında dəyişəcəksə, həmin şərtlər daxilində özəl pensiya fondları qiymətli kağızlarda vəsaitlərini 4-5 faizlə işlədəcəksə, vətəndaş ona maraq göstərməyəcək”. 

Ramiz