"Düşünürəm ki, Azərbaycanda uşaqların müdafiəsi yetərincə aparılır, amma mexanizmlərdə müəyyən boşluqlar var”.

Valyuta.az xəbər verir ki, bunu Qaynarinfo-ya açıqlamasında Azərbaycan Uşaqlar Birliyinin sədri Kəmalə Ağazadə 1 iyun Uşaqların Beynəlxalq Müdafiəsi Günündən danışarkən deyib. 

Sədr qeyd edib ki, bu diqqəti artırmaq üçün alternativ xidmətlərin yaradılmasına böyük ehtiyac var:

"Azərbaycanda Uşaqların Müdafiəsi Günü illərdir ki, qeyd edilir. Uşaqların müdafiəsi gününü ildə bir dəfə göstərici olaraq deyil, hər gün əməl etmək lazımdır. Uşaq hər zaman müdafiə olunmalıdır. Bu o demək deyil ki, müdafiə olunmur. Azərbaycanda uşaqlar qanun çərçivəsində müdafiə olunur. Bundan əlavə, yetərincə diqqət də var”.
 
Kəmalə Ağazadə bildirib ki, Azərbaycanda uşaq zorakılığı ilə bağlı mühim işlər görülür:

"Hər hansı bir uşaq zorakılığı ilə bağlı sosial şəbəkələrdə, yaxud da Daxili İşlər Nazirliyinin yaydığı məlumatlarda uşaqlara qarşı zorakılıq öz əksini tapırsa, bu o demək deyil ki, iş aparılmır. İş aparılır ki, biz bu halları görüb və onların qarşısını alırıq”.