“120 min əmək fəaliyyəti ilə məşğul olan həmvətənimizin Azərbaycana deportasiya olunması onların hüquq və azadlıqlarının pozulmasına, ölkədə işsizliyin  artmasına, iqtisadi problemlərə və digər  narahatlıqlara səbəb ola bilər”. 

Valyuta.az xəbər verir ki, bu sözləri Milli Məclisin deputatı Sabir Rüstəmxanlı bildirib. 

Rusiya Federasiyası Daxili İşlər Nazirliyinin MDB-yə üzv olan dövlətlərdən öz vətəndaşlarını bu ilin iyun ayının 15-nə qədər Rusiya ərazisindən çıxarmalarını tələb etməsi ilə bağlı məsələyə toxunan deputat bildirib ki, bu barədə nazir müavini Aleksandr Qorovoy MDB-nin Parlamentlərarası Assambleyasının toplantısında bəyan edib.  

Rusiya Federal DİN-in yaydığı son məlumatlara istinad edən S.Rüstəmxanlı qeyd edib ki, hazırda Rusiya ərazisində Özbəkistandan 332 min, Tacikistandan 247 min, Ukraynadan 152 min, Azərbaycandan 120 min, Qırğızıstandan 115 min, Ermənistandan 61 min, Moldovadan 56 min, Qazaxıstandan 49 min adam qeyri-leqal yaşayır. 

Millət vəkili, bir müddət öncə Mİlli Məclisdəki çıxışlarının birində əlaqədar təşkilatlara, o cümlədən Xarici İşlər Nazirliyinə və ASAN xidmətin rəhbərliyinə müraciət etdiyini xatırladıb: 

“Rusiyada, Türkiyədə və Almaniyada qanunsuz yaşayan həmvətənlərmizin deportasiya olunmaq təhlükəsi və sənəd əldə etmək çətinlikləri barədə məlumat vermişdim.  Eyni zamanda xahiş etmişdim ki, ASAN xidmətin səyyar briqadaları həmin ölkələrə göndərilsin və həmin ölkələrdə qanunsuz yaşayan  vətəndaşlarımızın sənədləşdirilməsini təmin etsin”.  

Onun fikrincə, RF-na indi də səyyar briqadaların göndərilməsi gec deyil: 

“Bu prosesə başlanılarsa, Rusiya  Federasiyası da Azərbaycan vətəndaşlarına bir necə ay güzəştə gedə bilər”. 

Deputat sonda vurğulayıb ki, ASAN xidmət, Rusiyadakı  səfirlik və konsulluqlarımız, digər dövlət təşkilatları ilə  birlikdə, gözlənilən deportasiyanın qarşısının alınması üçün qabağlayıcı tədbirlər görməlidirlər.