2020-ci il ərzində sığorta sektoru üzrə yığımlarda əvvəlki illə müqayisədə 7% artım olub. 

Valyuta.az Mərkəzi Banka istinadən xəbər verir ki, artımın əsas hissəsi həyat sığorta məhsulları üzrə baş verib. Həyat sığorta şirkətləri üzrə artım 14%, qeyri-həyat sığorta şirkətləri üzrə isə 3% təşkil edib.

Sığorta sahəsində nəzarətin təkmilləşdirilməsi məqsədilə risk əsaslı nəzarətə keçidlə bağlı Dünya Bankı ilə birgə hazırlanmış layihənin icrasına başlanıb. Mövcud qanunvericiliyə əsasən, sığortaçıların kapital tələbinin onların risklərinə əsasən diferensiasiya olunmaması sektorun risklərini artırır və maliyyə sabitliyi üçün təhdid yaradır.

Eyni zamanda, ehtiyatların yaradılması yalnız prudensial normativlərə əsaslanır ki, bu da qəbul edilmiş risklərə uyğun adekvat ehtiyat yaradılmasına maneələr yaradır. Mərkəzi bankdan bildirilib ki, layihənin icrası risklərin düzgün və vaxtında müəyyən edilməsinə, nəzarət resurslarının effektiv istifadəsinə, həmçinin sığortaçıların şəffaflıq səviyyəsinin və investisiya siyasətinə dair tələblərin yüksəldilməsinə xidmət edəcək. 

Eyni zamanda, sığorta bazarına nəzarətin gücləndirilməsi məqsədilə elektron sığorta nəzarət sisteminin təkmilləşdirilməsi üzrə işlər aparılmaqdadır. 

Daşınmaz əmlakın icbari sığortasının elektron qaydada aparılması məqsədilə qanunvericilik layihəsi hazırlanaraq müvafiq qurumlara təqdim edilib. 

Avtonəqliyyat vasitəsi sahiblərinin mülki məsuliyyətinin icbari sığortasının, istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığortası üzrə və digər sığorta qanunvericiliyinin təkmilləşdirilməsinə başlanılıb. Bu məqsədlə mövcud boşluqlar müəyyən edilib və onların aradan qaldırılması məqsədilə beynəlxalq təcrübəyə əsaslanan rəy və təkliflər hazırlanır.

Zeynəb Vəkil