"A-Qroup Sığorta" şirkətinin yığımları 2024-cü ilin ilk doqquz ayında 10,63 milyon manat təşkil edib ki, bu da ötən ilin eyni dövrünə nisbətən 14% azdır. 

Valyuta.az bu barədə Azərbaycan Mərkəzi Bankına istinadən xəbər verir.  Son bir ildə tibbi sığorta üzrə ixtisaslaşan sığorta şirkətinin yığımları 1,7 milyon manatdan çox azalıb. Belə ki, 2023-ci ilin ilk doqquz ayında şirkət 12,4 milyon manat sığorta haqqı toplaya bilmişdi. 

"A-Qroup” yığımlarla yanaşı, sığorta ödənişlərini də azaltmağa başlayıb. 

Belə ki, şirkətin ödənişləri yanvar-sentyabr aylarında 9% və ya 963 min manat civarında azalaraq 9,8 milyon manata enib. Ötən ilin eyni dövründə bu rəqəm 10,7 milyon manat təşkil edib. 

Şirkətin yığımlarında ödənişlərə nisbətən daha çox azalma onun zərərliyinə, yəni ödəniş-yığım nisbətinə mənfi təsir edib. “A Qroup”un zərərliliyi son bir ildə 87%-dən 92%-ə qədər yüksəlib.  

Xatırladaq ki, “A-Qroup Sığorta” 1995-ci ildə yaradılıb. Onun nizamnamə kapitalı 8 milyon manatdır. Səhmlərin 100%-i şirkətin Direktorlar Şurasının sədri Sabir Adna oğlu Adnayevə məxsusdur.

Pünhan