Biznesin hansı sahədə qurulmasından asılı olmayaraq yaxşı araşdırmaq, ətraflı məlumat toplamaq lazımdır. Bu biznes sahələrindən biri də sığorta şirkətidir. Ümumiyyətlə, sığorta şirkəti qurmaq istəyən şəxslər nələri bilməlidir?

Valyuta.az-a danışan sığorta eksperti Kamran Babayev bildirdi ki, ilkin olaraq keçilməli olan proses var: “İlk olaraq hüquqi şəxs bir şirkət yaratmalı, sonra sığorta fəaliyyəti göstərməklə bağlı lisenziya alınması üçün müvafiq orqana müraciət etməlidir. Lisenziyaya baxılmasında iki mərhələ olur. Birinci mərhələdə təsisçilər və qanunvericiliyə müvafiq qaydada vəkil edilmiş şəxslər tərəfindən lisenziya verilməsi üçün edilən ilkin müraciətə baxılır. İkinci mərhələdə isə Açıq Səhmdar Cəmiyyəti kimi dövlət qeydiyyatına alındıqdan sonra lisenziya verilməsi üçün yekun müraciətə baxılır. Lisenziyanın alınması üçün müvafiq sənədlər tələb olunur. Lisenziyanın verilməsi ilə bağlı müraciət məktubu, sığortaçının təsisçisi olmaq istəyən şəxslərlə bağlı məlumatları təsdiq edən sənədlər və s. Qanunvericilikdə bu tələblər var və bu sənədlər toplanıb sığorta nəzarəti orqanına təqdim edilir. Sığorta nəzarəti orqanı lisenziya verilməsi üçün yekun müraciət zamanı təqdim olunan sənədləri və məlumatları qanunvericiliyə uyğun hesab etdikdə bu barədə müraciət edənə bildirir. Lisenziya verilməsi üçün dövlət rüsumunu ödənilməsini təsdiq edən bank sənədi təqdim olunandan sonra müvafiq lisenziyanın verilməsinə baxılır”.

K.Babayev deyir ki, sığortaçının təsisçi və ya səhmdarı olmaq istəyən şəxs qanunvericiliyə uyğun olaraq müvafiq tələblərə cavab verməlidir. Bu, yerli hüquqi şəxs sığortaçısı və xarici sığortaçı üçün fərqlidir. 

“Sığorta şirkəti açmaq üçün minimum yatırım məbləği tələb olunur və uğurlu olması üçün müəyyən amillər var. Sığorta fəaliyyəti üçün tələb olunan minimum kapital 5 milyon manatdır. Əgər sığorta şirkəti həm də təkrarsığorta fəaliyyəti ilə məşğul olmaq istəyirsə, minimum tələb 10 milyon manatdır” - deyə, ekspert əlavə edib.

K.Babayev vurğulayıb ki, sığorta şirkəti qurmazdan əvvəl səhmdarların strategiyaları olmalıdır: “Onlar strategiyaya uyğun olaraq bilməlidir ki, bu şirkət hansı məqsədlə qurulur, sığorta bazarının hansı hissəsində aktiv olacaqlar, satış kanalları hansı olacaq, hansı sığorta növləri üzrə ixtisaslaşacaqlar, auditoriyası kim olacaq və s. bunlar hamısı müəyyən edilməli və strateji plan olmalıdır. Bundan əlavə şirkətin təbii ki, ofisi, avadanlıqları olmalı, işçi sayı müəyyən edilməli, sığorta növləri üzrə sığorta qaydaları hazırlanmalı və sığorta nəzarəti orqanında təsdiqlənməli, rəhbər şəxslər təyin edilməlidir. Bütün bunlara əsasən şirkət fəaliyyətə başlamalıdır”.

Bu biznesin uğurlu olmasının asılı olduğu məqamlara gəlincə, K.Babayev bildirdi: “Şirkət hədəflərini, auditoriyasını, hansı yönümlü olduğunu, satış planını, necə satış edəcəyini və s. bilməlidir. Əgər düzgün strategiya və təkrarsığorta siyasəti, yaxşı satış komandası, kifayət qədər satış kanalları olarsa, şirkət mənfəətlə çalışacaq. Sığorta şirkətinin gəlirləri yalnız sığorta fəaliyyətindən deyil, həmçinin investisiya gəlirlərindən də olmalıdır”.

K.Babayev onu da bildirib ki, bu sektorda gəlir və risklər də kifayət qədərdir: “Hər bir biznesdə risk olduğu kimi bu sahədə də risklər var. Sığorta şirkətinin maliyyə, hüquqi, bazar, valyuta və s. riskləri ola bilər. Sığorta şirkəti risklərini düzgün idarə etməlidir. Bunun üçün daxili audit, risklərin idarə edilməsi departamenti var. Bunlar düzgün idarəetmə ilə fəaliyyət göstərməlidir. Təkrarsığorta riskləri var ki, mütləq düzgün təkrarsığorta siyasəti olmalıdır. Fəaliyyət göstərən şirkət portfelindən asılı olaraq düzgün təkrarsığorta forması seçməlidir”.

Əvəz Həsənov