Azərbaycanda daha çox tibbi sığorta üzrə ixtisaslaşmış "A-Qroup Sığorta" şirkətinin yığımları 2023-cü ilin yanvar-oktyabr aylarında azalmaqda davam edib.  

Valyuta.az xəbər verir ki, sığorta şirkəti bu ilin ilk on ayında 13,3 milyon manat yığım əldə edib. Bu isə ötən ilin eyni dövrünə nisbətən 8,2% və ya 1,19 milyon manat azdır. 2022-ci ilin ilk on ayında şirkət 14,5 milyon manat sığorta haqqı toplaya bilmişdi. 

Yığımların azalması fonunda sığorta şirkətinin ödənişləri 14,6% və ya 1,5 milyon manat civarında artaraq 12,1 milyon manata yüksəlib. Ötən ilin yanvar-oktyabr aylarında bu rəqəm 10,5 milyon manat olub. Bu isə şirkətin ödəniş-yığım nisbətinə, yəni zərərliliyinə mənfi təsir göstərib. 

Sığorta şirkətinin zərərliliyi son bir ildə 72,7%-dən 90,8%-ə qədər yüksəlib. Yəni, şirkət ötən ilin on ayında topladığı sığorta haqqının hər 100 manatından 72,7 manatını ödənişə yönəldibsə, bu ilin eyni dövründə bu rəqəm 90,8 manata kimi artıb. 

Qeyd edək ki, bu il avqust ayının 11-də könüllü müraciət əsasında Azərbaycan Mərkəzi Bankı tərəfindən “A-Qroup Sığorta” şirkətinin avtomobillərin və daşınmaz əmlakın icbari sığortası, o cümlədən daşınmaz əmlakın istismarı ilə bağlı mülki məsuliyyətin icbari sığorta lisenziyası ləğv edilib. Bu isə sığorta şirkətinin yığımlarının həcminə, ümumilikdə isə bazar payına təsir edir.

Mahir