Bu ilin ilk üç rübü ərzində Bakı-Tbilisi-Ceyhan kəməri (BTC) üzrə əməliyyat xərclərinə təxminən 86 mln. dollar, əsaslı xərclərə isə 25 mln. dollar vəsait xərclənib (ümumi – 111 mln. dollar).

Valyuta.az xəbər verir ki, bu barədə  BP-nin (layihənin operatoru) Azərbaycanda apardığı əməliyyatlar üzrə bu ilin 9 ayının nəticələrinə dair dərc etdiyi hesabatında bildirilib.

1768 km uzunluğunda olan BTC boru kəməri 2006-cı ilin iyun ayında istismara veriləndən 2023-cü il sentyabr ayının sonunadək bu boru kəməri vasitəsilə ümumilikdə təqribən 554 mln. ton (4,2 mlrd.barel) xam neft nəql edilib və Ceyhanda 5482 tankerə yüklənərək dünya bazarlarına göndərilib. BTC-nin ümumilkdə 4 mlrd. barel neft ixracına nail olması əlamətdar bir uğur kimi 18 yanvar 2023-cü il tarixində qeyd edilib.

İlk üç rüb ərzində BTC vasitəsilə ixrac olunmuş təqribən 23 mln. ton (təxminən 171 mln. barel) xam neft və kondensat Ceyhan terminalında 238 tankerə yüklənib və yola salınıb.

Hazırda BTC boru kəməri əsasən Azərbaycandan “Azəri-Çıraq-Günəşli” blokunun nefti və “Şahdəniz” kondensatı daşıyır. Bundan əlavə, BTC vasitəsilə Xəzərin digər regional xam neft və kondensat həcmləri (Qazaxıstan və Türkmənistan) də nəql olunur.

© APA